মৰিগাঁও, 25 এপ্ৰিল : ৰাজ্যত লক ডাউনৰ সময়চোৱাত ৰেচন কাৰ্ড নথকা হিতাধিকাৰীক এক হাজাৰ টকাকৈ দিয়া সাহাৰ্য প্ৰদানত একাংশ পঞ্চায়তৰ সভাপতি/সভানেত্ৰীয়ে দুৰ্নীতি সংঘটিত কৰাৰ অভিযোগৰ বাতৰি পোহৰলৈ আহিছে ৷ তেনে সময়ত এই সাহাৰ্যৰ ধন বিতৰণৰ প্ৰসংগত মৰিগাঁও দেওশাল গাঁও পঞ্চায়ত সভানেত্ৰী সুশীলা বড়ো ডেকাই চ'ছিয়েল মিডিয়াত তেখেতৰ বিৰুদ্ধে অপপ্ৰচাৰ চলোৱাৰ অভিযোগ উত্থাপন কৰিছে । শাসকীয় দলৰ সভানেত্ৰী গৰাকীৰ জনপ্ৰিয়তাক ম্লান কৰাৰ বাবে বিৰোধী দলৰ অভিসন্ধি বুলি বুধবাৰে মন্তব্য কৰে পঞ্চায়তখনৰ সভানেত্ৰী তথা পঞ্চায়তখনৰ একাংশ ৰাইজে ।
উল্লেখযোগ্য যে সমগ্ৰ ৰাজ্যৰ লগতে মৰিগাঁৱৰ দেওশাল গাঁও পঞ্চায়ততো গাঁও পঞ্চায়তৰ পৰা বিতৰণ কৰা এক হাজাৰ টকীয়া সাহাৰ্য দিয়াত বৈষম্য হোৱা বুলি একাংশই অভিযোগ উত্থাপন কৰিছিল সামাজিক মাধ্যম যোগে । সেয়েহে পঞ্চায়ত সভানেত্ৰী সুশীলা বড়ো ডেকাই নিজৰ মন্তব্য দাঙি ধৰি এয়া এক অভিসন্ধি তথা চৰকাৰী নীতি নিয়ম অনুসৰিয়েই চৰকাৰী সাহাৰ্য বিতৰণ কৰা হৈছে বুলি ভাষ্য আগবঢ়ায় ৷
আনহাতে একেই মন্তব্য পঞ্চায়তখনৰ সচেতন লোকৰো । ৰাইজৰ মতে শাসকীয় বিজেপি দলৰ সভানেত্ৰী গৰাকীৰ জনপ্ৰিয়তাক একাংশ বিৰোধী দলৰ লোকে উদ্দেশ্য প্ৰণোদিত ভাৱে সামাজিক মাধ্যমত এই অপপ্ৰচাৰ চলাইছে ।
লগতে পঢ়ক : 9গৰাকীকৈ চিআৰপিএফ কৰ'ণা ভাইৰাছত আক্ৰান্ত
