মৰিগাঁও, 10 ডিচেম্বৰ : মৰিগাঁও স্কুলৰ খেলপথাৰত ভাৰতীয় জনতা পাৰ্টীৰ যুৱ মৰ্চাৰ উদ্যোগত শুকুৰবাৰে দিনজোৰা কাৰ্যসূচীৰে ছহিদ দিৱস উদযাপন কৰা হয়(Swahid Divas observes in Morigaon) ৷ অনুষ্ঠানটোত মুখ্য অতিথি হিচাপে উপস্থিত থাকি মুখ্যমন্ত্ৰী ড৹ হিমন্ত বিশ্ব শৰ্মাই (CM Himanta Biswa Sarma in Morigaon Swahid Divas) ছবছৰীয়া অসম আন্দোলনৰ ছহিদসকলক সুঁৱৰি শ্ৰদ্ধাঞ্জলি অৰ্পণ কৰে ৷
মুখ্যমন্ত্ৰীগৰাকীয়ে ছহিদ দিৱসৰ কাৰ্যসূচীত উপস্থিত থাকি কেইবাটাও গুৰুত্বপূৰ্ণ ঘোষণা কৰে ৷ তেওঁ গুৱাহাটীত অসম চৰকাৰে বিগত বৰ্ষৰ পৰা আৰম্ভ কৰা ছহিদ উদ্যানৰ নিৰ্মাণৰ কাম চলিত বৰ্ষত শেষ কৰাৰ কথা ব্যক্ত কৰে ৷ ইয়াৰ লগতে ছহিদ পৰিয়ালৰ কল্যাণৰ কাৰণে শুকুৰবাৰৰ পৰা এটা 5 কোটি টকাৰ ন্যাস আৰম্ভ কৰাৰ কথা জানিবলৈ দিয়ে ৷ তেওঁ এই ন্যাসৰ পৰা উপাৰ্জন হোৱা পুঁজিৰে ছহিদ পৰিয়ালৰ শিক্ষা, স্বাস্থ্য আদিৰ ব্যৱস্থা কৰাৰ লগতে 5 বছৰৰ ভিতৰত এই পুঁজি 50 কোটি টকালৈ লৈ যোৱাৰ ব্যৱস্থা কৰাৰ কথা জানিবলৈ দিয়ে ৷
মুখ্যমন্ত্ৰী শৰ্মাই লগতে ছহিদ খৰ্গেশ্বৰ তালুকদাৰৰ জন্মভূমি ভৱানীপুৰত ৰাজ্যিক ভিত্তিত এটা ছহিদ স্মৃতি চিহ্ন উদ্যান বাকৰি নিৰ্মাণৰ ব্যৱস্থা কৰাৰ কথাও জানিবলৈ দিয়ে ৷ তেওঁ লগতে ছহিদ পৰিয়ালসকলৰ চাকৰিৰ ক্ষেত্ৰত তেওঁলোকৰ পৰিয়ালত মুক্তিযুঁজাৰুৰ দৰে কিছু নম্বৰৰ ব্যৱস্থা কৰিব পৰা যায় নেকি তাৰ বাবেও কেবিনেটত বিবেচনা কৰা হ’ব বুলিও সদৰি কৰে ৷
মুখ্যমন্ত্ৰীগৰাকীয়ে লগতে কয় যে, অসম আন্দোলনৰ সময়ত আমি যিমান অসুৰক্ষিত হৈ আছিলো, আজিও আমি সিমানেই অসুৰক্ষিত ৷ অসম আন্দোলনৰ সময়ত দিল্লী আৰু দেশ বিদেশৰ পৰা হোৱা বাওপন্থীসকলৰ ষড়যন্ত্ৰ আমি দেখা পোৱা নাছিলো; কাৰণ সেই সময়ত ছ’চিয়েল মিডিয়া তেতিয়া সিমান সক্ৰিয় নাছিল ৷ গৰুখুঁটি উচ্ছেদৰ সময়ত আমি দেখা পাও যে অসমৰ বিৰুদ্ধে বিশ্ব দৰবাৰত ভুলকৈ কোৱা আৰু জাতিটোৰ বিৰুদ্ধে ষড়যন্ত্ৰ কৰা লোকৰ সংখ্যা এতিয়া বহু বেছি ৷ প্ৰত্যাহ্বান নেওচি আমি আগুৱাই যাব লাগিব ৷
আনহাতে মুখ্যমন্ত্ৰীৰ এই মন্তব্যৰ বিৰুদ্ধে প্ৰতিক্ৰিয়া ব্যক্ত কৰিছে ছহিদ পৰিয়ালে ৷ বিগত 38 বছৰে ছহিদ পৰিয়ালে কোনো চাকৰি বাকৰি তথা চৰকাৰী সাহাৰ্য লাভ নকৰিলে বুলি ক্ষোভ প্ৰকাশ কৰে ৷ তদুপৰি ছহিদ বেদীটো 38 বছৰেও সম্পূৰ্ণ নহ’ল বুলি আক্ষেপ প্ৰকাশ কৰে ৷ বিগত বৰ্ষটো একেখন চৰকাৰ থকাৰ পাছতো ছহিদ বেদীলৈ যোৱা পথটো সম্পূৰ্ণকৈ নিৰ্মাণ কৰা ন’হল বুলি ক্ষোভ প্ৰকাশ কৰে ৷
লগতে পঢ়ক : Swahid Divas in Morigaon : অসম আন্দোলনৰ শ্বহীদলৈ শ্ৰদ্ধা জনালে মুখ্যমন্ত্ৰীয়ে
