মৰিগাঁও, 26 ছেপ্টেম্বৰ: কোনে কাক কেতিয়া শেষ কৰিব ! সেয়া সময়ে ক’ব ৷ কিন্তু ৰাজনৈতিক নেতাসকলৰ মাজত কংগ্ৰছে মুক্ত বা বিজেপি মুক্তৰ প্ৰসংগ সঘনাই চৰ্চা চলিছে ৷ বিশেষকৈ নিৰ্বাচনৰ প্ৰাকমুহূৰ্তত কংগ্ৰেছ মুক্ত বা বিজেপি মুক্ত কথা চলে ৷ সেয়ে অলপ চেষ্টা কৰিলে কংগ্ৰেছ মুক্ত কৰিব পৰা হ’ব বুলি মন্ত্ৰী পীযুষ হাজৰীকাই কোৱা মন্তব্যক ওভতি ধৰিলে সাংসদ প্ৰদ্যুৎ বৰদলৈয়ে ৷
সোমবাৰে জাগীৰোডত সাংসদ প্ৰদ্যুত বৰদলৈ উপস্থিত হৈ মন্ত্ৰী পীযুষ হাজৰীকাই কৰা মন্তব্যৰ প্ৰত্যুত্তৰ দি কয়, ‘‘বৰ্তমানৰ মন্ত্ৰী পীযুষ হাজৰীকা এসময়ত কংগ্ৰেছৰ দলৰে আছিল ৷ সেই কথা তেওঁ কিয় পাহৰিছে ৷ তেওঁ পিতৃ কংগ্ৰেছত আছিল ৷ এসময়ত যুৱ কংগ্ৰেছ কৰি ৰাজনীতিলৈ আহিল ৷ যেতিয়া অহংকাৰী হৈ থাকে বা গৰম ভাতৰ ধোঁৱাই খোৱা বুলি কয় তেতিয়া এনেধৰণৰ কথা কয় ৷ ইমান ডাঙৰ অহংকাৰী কথা ক’ব নাপায় ৷ কোনো শক্তিয়ে কংগ্ৰেছ দলক শেষ কৰিব নোৱাৰে ৷’’
সাংসদ বৰদলৈয়ে লগতে কয়, ‘‘ভাৰতবৰ্ষৰ এনেকুৱা এখন গাঁও নাই য’ত কংগ্ৰেছৰ এজন নিষ্ঠাবান কৰ্মী নাই ৷ সেয়ে কংগ্ৰেছৰ শিপা পাতাললৈকে শিপাই আছে ৷ গতিকে ক্ষুদ্ৰ নৰমনিচ এজনে কংগ্ৰেছক কেতিয়াও উচ্ছন্ন কৰিব নোৱাৰে ৷ কংগ্ৰেছ মুক্ত ভাৰতৰ কথা কৈ এতিয়া কংগ্ৰেছৰ আতংকত ভুগিছে তেওঁলোক ৷ মানুহ যেতিয়া খুব বেছি অহংকাৰী হয়, যেতিয়া ক্ষমতাৰ মতগৰ্ব্বী হৈ থাকে, তেতিয়াই এনেধৰণৰ কথা মুখত ওলায় ৷’’
সোমবাৰে জাগীৰোডৰ গোপালকৃষ্ণ চাহ বাগিচাত আয়োজন কৰা চাহ জনগোষ্ঠীৰ অন্যতম উৎসৱ কৰম পৰবত উপস্থিত থাকি এই মন্তব্য কংগ্ৰেছ সাংসদ প্ৰদ্যুৎ বৰদলৈৰ ৷
