মৰিগাঁও,23 জুলাই: মৰিগাঁও জিলাৰ ভূৰাগাঁৱতো তাণ্ডৱ সৃষ্টি কৰিছে ব্ৰহ্মপুত্ৰৰ বাঢ়নী পানীয়ে ৷ অঞ্চলটোৰ বান পৰিস্থিতি কিছু স্বাভাৱিক হৈছিল যদিও পুনৰ ব্ৰহ্মপুত্ৰৰ জলস্তৰ বৃদ্ধি পোৱাত তৃতীয়টো বানৰ কবলত পৰিছে ভূৰাগাঁৱবাসী । জিলাখনৰ দীঘলীআটিৰ পৰা আমবাঘান সংযোগী প্ৰায় ছয় কিল’মিটাৰ অঞ্চল উন্মুক্ত মথাউৰিৰে হোৰাহোৰে পানী সোমাই অহাত প্লাৱিত হৈছে বৃহত্তৰ অঞ্চল ৷
বানে জুৰুলা কৰা গাঁৱৱাসীৰ দুখ কুলাই-পাচিয়ে নধৰা হোৱাৰ লগতে দেখা দিছে খাদ্য সংকটে ৷ জিলাখনৰ বানাক্ৰান্তৰ কাষত বৃহস্পতিবাৰে থিয় দিয়ে অসম প্ৰদেশ কংগ্ৰেছ কমিটিৰ মুখপাত্ৰ ইমদাদ হুছেইনে । হুছেইনে ভূৰাগাঁৱৰ বানাক্ৰান্ত অঞ্চল পৰিদৰ্শন কৰি ৰাইজৰ সৈতে মত বিনিময় কৰি বানাক্ৰান্তৰ মাজত অত্যাৱশ্যকীয় খাদ্য সামগ্ৰী বিতৰণ কৰে । লগতে সংবাদ মাধ্যমৰ আগত মুখ্যমন্ত্ৰী সৰ্বানন্দ সোণোৱালক সৰ্বকালৰ ব্যৰ্থ আৰু মিছলীয়া মুখ্যমন্ত্ৰী আখ্যা দি বিজেপিৰ মিত্ৰজোঁট চৰকাৰক ক্ষুৰধাৰ সমালোচনা কৰে ।
লগতে চাওকঃ বান পৰিস্থিতিৰ অৱনতিঃ 89 গৰাকীলৈ বৃদ্ধি মৃতকৰ সংখ্যা
