মাজুলী,14 মাৰ্চঃ মাজুলীৰ বৰদোৱাত 7 বছৰ পূৰ্বে সংঘটিত হৈছিল এক লোমহৰ্ষক হত্যাকাণ্ড । এজাক উন্মত্ত লোকে শোৱাপাটিৰ পৰা উঠাই নি নৃশংসভাৱে হত্যা কৰিছিল শান্তনু দলে নামৰ যুৱকজনৰ পিতৃ-মাতৃ আৰু ভাতৃক । একেটা পৰিয়ালৰে তিনিজন ব্যক্তিক হত্যা কৰি নদীত উটাই দিছিল দুৰ্বৃত্তই । ডাইনী সন্দেহত দুৰ্বত্তই হত্যা কৰিছিল লোককেইজনক ৷ ঘটনা সন্দৰ্ভত 7বছৰ ধৰি চলা গোচৰৰ পিছত ন্যায় পালে শান্তনুৱে ।
শুকুৰবাৰে যোৰহাটৰ ছেচন আদালতে উক্ত হত্যাকাণ্ডৰ চূড়ান্ত ৰায় প্ৰদান কৰে ৷ লগতে অভিযুক্তসকলৰ এজনক ফাঁচী আৰু 11জনক যাৱজ্জীৱন কাৰাদণ্ড দিয়ে আদালতে । পিতৃ-মাতৃৰ মৃত্যুৰ পাছত জেংৰাইমুখৰ মোমায়েকৰ ঘৰত ডাঙৰ দীঘল হয় শান্তনু । শনিবাৰে গড়মুৰ আৰক্ষী আৰু অৰ্ধ-সামৰিক বাহিনীক লগত লৈ শান্তনু দলে উপস্থিত হয় নিজ পিতৃ-মাতৃৰ ঘৰত । নামনি মাজুলীৰ বৰদোৱাৰ পৰা শান্তনু তিতালাওস্থিত বাসগৃহত উপস্থিত হয় । দীৰ্ঘদিনে পৰিত্যক্ত ঘৰটোৰ ধংসাৱশেষৰ মাজত এতিয়াও ঠিয় হৈ আছে ঘৰটোৰ পকা খুঁটাকেইটা,বেৰত ওলমি ৰৈছে শান্তনুয়ে বিদ্যালয়লৈ নিয়া বেগটো ।
আনহাতে,দনিপলক সাক্ষী কৰি পৰম্পৰা অনুসৰি ধুপ-বন্তি জ্বলাই সেৱা কৰি পিতৃ-মাতৃ আৰু ভাতৃৰ বিদেহী আত্মাৰ সদগতি কামনা কৰে ।
লগতে চাওকঃযোৰহাটত ডাইনী হত্যাত জড়িত দোষীক যাৱজ্জীৱন কাৰাদণ্ডৰ নিৰ্দেশ
