কেন্দ্ৰীয় মন্ত্ৰী হিচাপে প্ৰথমবাৰৰ বাবে মাজুলীত সৰ্বানন্দ সোণোৱাল

কেন্দ্ৰীয় মন্ত্ৰী দায়িত্ব লোৱাৰ পাচত প্ৰথমবাৰৰ বাবে মাজুলীত উপস্থিত প্ৰাক্তন মুখ্যমন্ত্ৰী তথা মাজুলীৰ প্ৰাক্তন বিধায়ক সৰ্বানন্দ সোণোৱাল ৷ মাজুলীৰ বাবে সদায় দ্বায়বদ্ধতাৰে কাম কৰাৰ লগতে মাজুলীৰ উন্নয়নত বিশেষভাৱে গুৰুত্ব প্ৰদান কৰাৰ আশ্বাস সোণোৱালৰ ৷

মাজুলী, 25 আগষ্ট : কেন্দ্ৰীয় মন্ত্ৰীৰ দায়িত্ব গ্ৰহণ কৰাৰ পাচতে বুধবাৰে প্ৰথমবাৰৰ বাবে মাজুলীত উপস্থিত হয় প্ৰাক্তন মুখ্যমন্ত্ৰী তথা মাজুলীৰ প্ৰাক্তন বিধায়ক সৰ্বানন্দ সোণোৱাল ৷ মাজুলীৰ বংশী গোপাল নাট্য মন্দিৰত উপস্থিত হোৱাৰ পাচতে বৰ্ণাঢ্য কাৰ্যসূচীৰে সোণোৱালক আদৰণী জনাই মাজুলীবাসীয়ে ৷ এই উপলক্ষে আয়োজন কৰা সভাত প্ৰাক্তন মুখ্যমন্ত্ৰী তথা কেন্দ্ৰীয় মন্ত্ৰী সৰ্বানন্দ সোণোৱালক ফুলৰ থোপা, গামোচা আৰু শৰাই আদি প্ৰদান সম্বৰ্ধনা জ্ঞাপন কৰে বিজেপি কৰ্মী সকলে ৷

মাজুলী ভ্ৰমণত সৰ্বানন্দ সোণোৱালক সংগ দিয়ে সাংসদ প্ৰদান বৰুৱাৰ লগতে বিধায়ক নৱ দলেয়ে ৷ উক্ত সভাৰ পাচতে প্ৰাক্তন মুখ্যমন্ত্ৰী সৰ্বানন্দ সোণোৱালে কয়, যদিও তেওঁ দিল্লীত থাকিব তথাপিও মাজুলীবাসীৰ প্ৰতিটো খবৰ তেওঁ ৰাখিব ৷ মাজুলীৰ বাবে সদায় দ্বায়বদ্ধতাৰে কাম কৰাৰ লগতে মাজুলীৰ উন্নয়নত বিশেষভাৱে গুৰুত্ব প্ৰদান কৰিব ৷

লগতে পঢ়ক: পুনৰ হাগ্ৰামা মহিলাৰীৰ হাতলৈ যাব পাৰে বড়ো ভূমিৰ শাসনৰ বাঘজৰী !

দিল্লীলৈ যোৱাৰ পিছত মাজুলীৰ উন্নয়ন স্থবিৰ হ'ব নেকি বুলি সাংবাদিকে সোধা প্ৰশ্নৰ উত্তৰত তেওঁ কয়, মাজুলীৰ উন্নয়ন স্থবিৰ কেতিয়াও নহয় ৷ ৰাজ্য চৰকাৰে মাজুলীৰ উন্নয়নত অধিক গুৰুত্ব প্ৰদান কৰিছে ৷ হিমন্ত বিশ্ব শৰ্মাৰ ১০০ দিনত যথেষ্ট ভাল কাম হৈছে মন্তব্য প্ৰকাশ কৰে প্ৰাক্তন মুখ্যমন্ত্ৰী সৰ্বানন্দ সোণোৱালে ৷

ইয়াৰ লগতে মাজুলীৰ বিজেপিৰ কৰ্মী, অনুষ্ঠান-প্ৰতিষ্ঠানৰ লগতে বিভিন্ন দল সংগঠনৰ প্ৰতিনিধি সকলক কৃতজ্ঞতা জ্ঞাপন কৰে কেন্দ্ৰী মন্ত্ৰীগৰাকীয়ে ৷ সভাৰ পাছতেই ঐতিহাসিক গড়মূৰ সত্ৰলৈ গৈ বংশীগোপালৰ ওচৰত সেৱা গ্ৰহণ কৰে সৰ্বানন্দ সোণোৱালে । ডেকা সত্ৰাধিকাৰ পৰমানন্দ গোস্বামীয়ে কেন্দ্ৰীয় মন্ত্ৰী গৰাকীক আদৰণি জনায় ।

লগতে পঢ়ক: ACS বিষয়া চাইবুৰ ৰহমানৰ বিলাসী অট্টালিকাত মুখ্যমন্ত্রীৰ তদাৰকী কোষৰ অভিযান