নাওবৈচা,26 ছেপ্তেম্বৰঃ সাত সাগৰ তেৰ নদীৰ সিপাৰে আমেৰিকাত উমলিছে অসমৰ দুই দিব্যাংগ কণমানি শিশুৱে ৷ পিতৃ-মাতৃ কাৰোৰে পৰিচয় নথকা দুই দিব্যাংগ শিশুৰ নাম পূজা আৰু কল্যাণ ৷ সুদূৰ আমেৰিকাত নতুন পৰিচয় আৰু হাঁহি-ধেমালিৰ মাজেৰে এতিয়া দিন অতিবাহিত কৰিছে দুয়োৱে ৷ আমেৰিকাৰ লুকি এডকইন আৰু লুচীয়া নোইমি ৱাৰ্ড নেলচন নামৰ দম্পতিৰ ছত্ৰছায়াত আছে পূজা ৷ শিকিছে আমেৰিকাৰ ভাষা,আয়ত্ব কৰিছে আমেৰিকাৰ ৰীতি-নীতি ৷ ইপিনে দিব্যাংগ কল্যাণক আকোঁৱালি লৈছে আমেৰিকাৰ জেফ্ৰি পিৰচন ৱাল আৰু ষ্টীফেৰিণ মেৰিয়া ৱাল নামৰ দম্পতিয়ে ৷ পূজাৰ দৰেই কল্যাণেও লাভ কৰিছে এতিয়া এক সুকীয়া পৰিচয় ৷
জানিব পৰা মতে, 2018 চনত লখিমপুৰৰ "মৰম"নামৰ এক অগ্ৰণী স্বেচ্ছাসেৱী অনুষ্ঠানৰ পৰা দুই কণমানিক লৈ যোৱা হৈছিল আমেৰিকালৈ ৷ অনুষ্ঠানটোৰ ৱেবচাইটত পূজা আৰু কল্যাণৰ বিষয়ে গম পাই আমেৰিকাৰ এই দম্পতিয়ে দুয়োকে নিজৰ কৰি লোৱাৰ বাবে আগ্ৰহ প্ৰকাশ কৰে । ইয়াৰ পিছতে যাৱতীয় সকলে কাম-কাজ সম্পন্ন কৰি লখিমপুৰ জিলা উপায়ুক্ত ,আৰক্ষী অধীক্ষকৰ উপস্থিতিত "মৰম" অনুষ্ঠানে বিধিগত ভাৱে পূজা আৰু কল্যাণক তুলি দিছিল আমেৰিকাৰ দম্পতিৰ কোলাত ৷ আনহাতে,নতুন পিতৃ-মাতৃৰ পৰিচয় লাভ কৰি মৰম-চেনেহৰ মাজেৰে আপোন পাহৰা হৈ এতিয়া দুয়ো উমলিছে সুদূৰ আমেৰিকাৰ মাটিত ৷
