লখিমপুৰ, 4 জুন : বিকশিত অসমৰ পৰিৱৰ্তনৰ নমুনা । বাঁহৰ খুটা, গছে-বনে বিদ্যুৎ পৰিবাহী তাঁৰ ওলমি আছে এখন গাঁৱত । পৰিৱৰ্তন, বিকশিত অসম আদি শ্ল’গানেৰে ৰাজ্যখনত উন্নয়নৰ ঢাক-ঢোল কোবাই অহা হৈছে যদিও বাস্তৱত কিন্তু ওলোটা প্ৰতিচ্ছবিহে পৰিলক্ষিত হৈছে । বাস্তৱত বহু ক্ষেত্রত এনে উন্নয়নৰ শ্ল’গানক ভেঙুচালি কৰি গাঁৱে ভূঞে চলি আছে বিধ্বস্ত বহু চৰকাৰী বিভাগৰ আঁচনি (Poor electricity connection in Lakhimpur) ।
আমি কৈ থকা গাঁওখন আছে লখিমপুৰ জিলাত ৷ লখিমপুৰৰ বিভিন্ন গ্ৰাম্যাঞ্চলত এতিয়া এনে দৃশ্য সুলভ হৈ পৰিছে । অভিযোগ অনুসৰি, জিলাখনৰ ঐতিহাসিক ঘুনাসূতিৰ চলিচুক বালি চাপৰি গাঁৱৰ এয়া বাস্তৱ চিত্র । অতি বিপদজনক ৰূপত আছে গাঁওখনৰ বিদ্যুৎ সংযোগ ব্যৱস্থা ।
বিদ্যুতৰ খুঁটা নোপোৱাৰ বাবে বাঁহ নাইবা কলগছৰ পৰা আদি কৰি বহু গছৰ ওপৰেৰে অতি ভয়াৱহ ৰূপত বিজুলী সংযোগ কৰা হৈছে এই গাঁওখনত । স্থানীয় ৰাইজে উল্লেখ কৰা অনুসৰি, উক্ত অঞ্চলটোত 25 ৰ পৰা 30 ঘৰ মানুহ আছে ৷ কিন্তু প্ৰত্যক ঘৰে আৰ্থিকভাৱে সবল নহয় ৷ সেয়ে বিদ্যুতৰ খুঁটাৰ বাবদ প্ৰত্যেক ঘৰে দিব পৰা নাই 600 টকাকৈ ৷
ঘৰে প্ৰতি 600 টকাকৈ দিব নোৱাৰৰ বাবেই গাঁওখনত বিদ্যুতৰ খুঁটা দিয়া নাই বিভাগীয় কৰ্তৃপক্ষই । উপায়ন্তৰ হৈ স্থানীয় ৰাইজে গছৰ ওপৰেৰে নাইবা বাঁহৰ খুঁটাপুতি বিদ্যুৎ পৰিবাহী তাঁৰ সংযোগ কৰি অতি বিপদজনকভাৱে ঘৰসমূহত বিজুলী সংযোগ কৰাৰ ব্যৱস্থা কৰিছে । সংবাদ মাধ্যমৰ আগত এই কথা ব্যক্ত কৰে স্থানীয় ৰাইজে ৷
ইফালে ঘূণাসূতি চলিচুক বালি চাপৰি গাঁৱৰ এনে উন্নয়নৰ নমুনাই এতিয়া চিন্তিত কৰি তুলিছে সচেতন লোকক । কিয়নো যিকোনো মূহুৰ্ততে হ’ব পাৰে ভয়ানক বিপদ ৷ সেয়ে স্থানীয় ৰাইজে তৎকালীনভাৱে অঞ্চলটোৰ বিদ্যুৎ ব্যবস্থা সুচল কৰিবলৈ দাবী জনাইছে বিভাগীয় কৰ্তৃপক্ষক ।
লগতে পঢ়ক : Guwahati water supply: আগন্তুক তিনি দিনলৈ গুৱাহাটীৰ ৰাইজে নাপাব পানী
