লখিমপুৰ, 13 মে' : প্ৰধানমন্ত্ৰী কৃষক সন্মান নিধি আঁচনিৰ নামত লখিমপুৰ জিলাৰ কুমাৰ কটা গাঁৱত ভয়ংকৰ দুৰ্নীতি সংঘটিত হোৱাৰ তথ্য পোহৰলৈ আহিছে ৷ প্ৰকৃত হিতাধিকাৰীক বঞ্চিত কৰি ভুৱা কৃষকৰ নাম তালিকাত অন্তভূক্ত কৰাৰ অভিযোগ স্থানীয় ৰাইজৰ ৷
অভিযোগ অনুসৰি, জিলাখনৰ আজাদ পঞ্চায়তত সংঘটিত হৈছে এই দুৰ্নীতি ৷ লক্ ডাউনৰ বাবে ক্ষতিগ্ৰস্থ হোৱা কৃষক সকলক চৰকাৰে সাহায্য প্ৰদানৰ বাবে প্ৰস্তুত কৰিবলৈ দিয়া তালিকাত একাংশ চৰকাৰী চাকৰিয়াল, গাঁওবুঢ়াৰ নাম অন্তভূক্ত হোৱা অভিযোগ প্ৰদান কৰিছে ভুক্তভোগী ৰাইজে ৷
আনকি একোটা পৰিয়ালৰ তিনি-চাৰিজন লোকে এই ধন লাভ কৰা বুলি গাঁওবাসীয়ে অভিযোগ উখাপন কৰে ৷ ফলত গাঁওখনৰ 100 কৃষক আঁচনিৰ ধন লাভ কৰাৰ পৰা বঞ্চিত হ'ব লগা হোৱা বুলি গাঁওবাসীয়ে উল্লেখ কৰে ৷ একাংশ পঞ্চায়ত প্ৰতিনিধি আৰু মধ্যভোগী লোকে এই তালিকা প্ৰস্তুত কৰাৰ বাবে এই অনিয়ম সংঘটিত হোৱা বুলি ৰাইজে অভিযোগ কৰে ৷
অনতিপলমে গাঁওবাসীয়ে উক্ত বিষয় সন্দৰ্ভত উচিত তদন্ত বিচাৰিছে ৷
লগতে পঢ়ক : বৰপেটাত মন্ত্ৰী নৱ কুমাৰ দলেৰ পৰ্যালোচনা বৈঠক
