কোকৰাঝাৰ, 30 জুন : অসমৰ শক্তি আৰু সাংস্কৃতিক মন্ত্ৰী বিমল বৰা (bimal borah)ই মঙলবাৰে কোকৰাঝাৰ ভ্ৰমণৰ উদ্দেশ্যে জিলাখনত উপস্থিত হয় ৷ মন্ত্ৰী বৰাই প্ৰথমে কোকৰাঝাৰৰ অসম শক্তি বিতৰণ নিগম(APDCL)ৰ কাৰ্যালয় পৰিভ্ৰমণ কৰি বিভাগীয় বিষয়া-কৰ্মচাৰীৰ সৈতে এক আলোচনাত মিলিত হয় ৷ আলোচনাৰ পাচতে মন্ত্ৰীগৰাকীয়ে কোকৰাঝাৰ জিলাৰ ফকিৰাগ্ৰাম আৰু ধুবুৰী জিলাৰ বিলাসীপাৰা, ৰাণীগঞ্জ পৰিভ্ৰমণ কৰি গ্ৰাহকে বিদ্যুতৰ মাচুল নিদিয়াৰ সন্দৰ্ভত বুজ লয় ৷
ধুবুৰী পৰা উভতি আহি মন্ত্ৰী বিমল বৰা (bimal borah)ই পোনে পোনে কোকৰাঝাৰ জিলা বিজেপি (BJP) কাৰ্যালয়ত দলীয় কৰ্মকৰতা সৈতে আলোচনা মিলিত হয় । আলোচনাৰ অন্তত মন্ত্ৰী বৰাই সংবাদ মাধ্যমৰ আগত সদৰী কৰা মতে ফকিৰাগ্ৰামত হাজাৰ হাজাৰ লোকে বিদ্যুতৰ বিল পৰিশোধ কৰা নাই । ৰাণীগঞ্জত বিদ্যুত বিল অনাদায় হৈ থকাৰ পৰিণতিতে একাংশ গ্ৰাহকৰ বিদ্যুৎ সংযোগ কৰ্তন কৰা হৈছে ৷ যাৰ ফলত সংযোগ বিচ্ছিন্ন কৰিবলৈ যোৱা বিদ্যুত কৰ্মীৰ ওপৰত শাৰিৰীক আক্ৰমণ পৰ্যন্ত চলিছে ।
উল্লেখ্য যে, বিলাসীপাৰাত মুঠ ৫৪ হাজাৰ গ্ৰাহকৰ ভিতৰত মাথো ৮ হাজাৰ গ্ৰাহকেহে বিদ্যুত বিল পৰিশোধ কৰিছে আৰু অদ্যপি ৪২ কোটি টকা বকেয়া ধন পাবলৈ বাকী আছে ।
সকলোকে সময়মতে বিদ্যুতৰ বিল পৰিশোধ কৰিবলৈ আহ্বান জনাই মন্ত্ৰী বিমল বৰাই কয়, আগন্তুক ১ জুলাইৰ পৰা ১০ জুলাইলৈ সমগ্ৰ ৰাজ্যত বিল অনাদেয় গ্ৰাহকৰ বিৰুদ্ধে সংযোগ কৰ্তনৰ বিশেষ অভিযান চলোৱা হ'ব ৷ আনহাতে, ৰাজ্যত ২,২০০ মেগাৱাট বিদ্যুতৰ দৰকাৰ হয় আৰু বৰ্তমান অসমত কোনোধৰণৰ লোডশ্বেডিং নাই বুলি সদৰী কৰিছে বিমল বৰাই । তদুপৰি সকলো গাঁৱতে বৈদ্যুতিককৰণ হৈছে মাথো কৰবাতহে ১০০ মিটাৰ অথবা ২০০ মিটাৰ কাম বাকী আছে বুলি মন্তব্য কৰে ৷
লগতে বিদ্যুৎ বিভাগৰ সংস্কাৰৰ প্ৰয়োজন আছে বুলি মন্তব্য কৰি মন্ত্ৰী বৰাই কয়, বিলিং প্ৰক্ৰিয়া, মিটাৰিং প্ৰক্ৰিয়া আগন্তুক সময়ছোৱাত উন্নত কৰা হ'ব ৷ ইপিনে, শুৱালকুছিত ক'ভিড প্ৰট'কল ভংগ কৰি ফুটবল খেলাটো উচিত হোৱা নাই আৰু উক্ত ভুলৰ বাবে অসমৱাসীৰ ওচৰত ক্ষমা ভিক্ষা মাগি ভৱিষ্যতে এনে ভুল নহয় বুলি মন্তব্য কৰিছে শক্তিমন্ত্ৰী বিমল বৰাই ।
লগতে পঢ়ক: ঘৰে ঘৰে গৈ অবৈধ বিদ্যুৎ সংযোগ কৰ্তন APDCL ৰ
