কৰিমগঞ্জ, 7 নৱেম্বৰ : ভূমি বিবাদক কেন্দ্ৰ কৰি পাথাৰকান্দি সমষ্টিৰ অসম মিজোৰাম সীমান্তত বৰ্তমানেও অব্যাহত আছে তীব্ৰ উত্তেজনা ৷ এই সন্দৰ্ভত অসম মিজোৰাম সীমান্তৰ মেদলিছৰা অঞ্চলত উত্তপ্ত পৰিস্থিতি অব্যাহত থকাৰ মাজতে শনিবাৰে উক্ত স্থান পৰিদৰ্শনৰ বাবে মেদলিছৰাত উপস্থিত হয় আৰক্ষীৰ মহা পৰিদৰ্শক দীপক কেডিয়া ৷ বিষয়া জনৰ লগতে উক্ত স্থানত উপস্থিত হয় উপ আৰক্ষী মহা পৰিদৰ্শক দিলীপ দে, কৰিমগঞ্জৰ জিলা উপায়ক্ত আম্বামুথান এমপি আৰু আৰক্ষী অধীক্ষক মায়ংক কুমাৰ ৷
ঘটনাস্থলীত উপস্থিত হৈ অসম মিজোৰাম সীমান্তৰ মেদলিছৰা দলঙৰ কাষত অসমৰ ভূমি আগ্ৰাসন কৰা মিজো নিৰাপত্তাৰক্ষীসকলৰ লগত অসমৰ বিষয়া সকলে কথা পতাৰ চেষ্টা কৰে যদিও আগবাঢ়ি নাহিল মিজো আৰক্ষী ৷ কেন্দ্ৰীয় চৰকাৰৰ নিৰ্দেশ অনুসৰি, উক্ত স্থানত বৰ্তমান এক কোম্পানী এছ এছ বি বাহিনী মোতায়েন কৰা হৈছে ৷
এই সন্দৰ্ভত কৰিমগঞ্জৰ আৰক্ষী অধীক্ষক মায়াংক কুমাৰে উল্লেখ কৰে যে, যদিও কৰিমগঞ্জ জিলাৰ অসম মিজোৰাম সীমান্তত কোনো অপ্ৰীতিকৰ ঘটনা সংঘটিত হোৱা নাই তথাপি কিন্তু উক্ত অঞ্চলত এক উত্তেজনাই বিৰাজ কৰি আছে ৷ যাৰ বাৱে শনিবাৰে আইন শৃংখলাৰ দায়িত্ব থকা আৰক্ষী মহা পৰিদৰ্শকে আহি নিৰাপত্তাৰ বুজ লয় ৷ সীমান্তত থকা ৰাইজৰ নিৰাপত্তাৰ ক্ষেত্ৰত সকলো ধৰণৰ ব্যৱস্থা গ্ৰহণ কৰা হৈছে বুলি উল্লেখ কৰিছে আৰক্ষী বিষয়া গৰাকীয়ে ৷
লগতে পঢ়কঃ তেজপুৰত এন এছ চি এনৰ দুৰ্ধষ কেডাৰ আটক
