কৰিমগঞ্জ, 14 নৱেম্বৰ: কৰিমগঞ্জৰ গিৰিশগঞ্জত আছাম ৰাইফলছ আৰু সেনাৰ অভিযান ৷ অভিযানত জব্দ বৃহৎ পৰিমাণৰ নিচা জাতীয় টেবলেট। গিৰিশগঞ্জ এলেকাৰ পৰা চাৰি হাজাৰ নিচাজাতীয় টেবলেটসহ আটক তিনি ড্ৰাগছ সৰবৰাহকাৰী ৷ আটকাধীন যুৱক কেইজন হৈছে আলতাফ হুছেইন,ৰুহুল আলম আৰু আহমদ চুলতান ৷ আছাম ৰাইফলছৰ 29 নং বেটেলিয়নৰ জোৱানে নিচাযুক্ত সামগ্ৰীসহ যুৱক কেইজনক আটক কৰি গতাই দিয়ে কৰিমগঞ্জ সদৰ থানাত ৷ কিন্তু কৰিমগঞ্জ আৰক্ষীৰ ভূমিকাক লৈ উঠিছে প্ৰশ্ন ৷
কিয়নো সেনা জোৱানৰ অভিযানত আটকাধীন তিনি যুৱকক এৰি দিয়াৰ চেষ্টা চলাইছে কৰিমগঞ্জ আৰক্ষীয়ে। প্ৰথমতে কৰিমগঞ্জৰ সদৰ থানাৰ আৰক্ষীয়ে ধৃত যুৱক কেইজনক কেমেৰাৰ সন্মুখত মন্তব্য দিয়াৰ পৰা বিৰত ৰাখে। একাংশ লোকৰ অভিযোগ,পৰৱৰ্তী সময়ত সন্দেহযুক্ত অভিযুক্ত সকলৰ আত্মীয়ৰ সৈতে আৰক্ষীয়ে থানাৰ পৰা সামান্য আঁতৰত বহু সময় ধৰি গোপন কথা বাৰ্তাত লিপ্ত হয়।
ইপিনে সাংবাদিক সকলৰ হেঁচাত আৰক্ষীগৰাকীয়ে টেবলেট সমূহ দেখুৱাই যদিও বিভ্ৰান্তিকৰ মন্তব্য প্ৰকাশ কৰে । তদন্তকাৰী আৰক্ষীগৰাকীৰ মতে লোক কেইজনক আটক কৰাৰ সময়ত তেওঁ উপস্থিত নাছিল । কিন্তু পৰৱৰ্তী সময়ত ভাষ্য সলনি কৰি তেওঁ উল্লেখ কৰে ধৃত লোককেইজনৰ লগত টেবলেট উদ্ধাৰ হোৱা নাছিল। টেবলেটখিনি পথৰ দাঁতিত হে পোৱা গৈছিল ।
এতিয়া প্ৰশ্ন উঠিছে যদিহে তেওঁ অভিযানত উপস্থিত নাছিল তেন্তে তেওঁ কেনেকৈ জানিলে পালে ধৃত যুৱক কেইজনৰ লগত টেবলেট উদ্ধাৰ হৈছিল নে নাই। ইয়াৰ উপৰিও সাংবাদিকে প্ৰায় 6 ঘন্টা জুৰি অনুৰোধ জনোৱাৰ পাছতো ধৃত সকলৰ ছবি ল’বলৈ মান্তি নহ’ল কৰিমগঞ্জ সদৰ থানাৰ আৰক্ষীয়ে।
লগতে চাওক-তথ্য জনা অধিকাৰ আইনৰ অধীনলৈ উচ্চতম ন্যায়ালয়ৰ মুখ্য ন্যায়াধীশৰ কাৰ্যালয়
