ডিফু, 24 নৱেম্বৰঃ মঙলবাৰে পশ্চিম কাৰ্বি আংলং জিলাত গঠন কৰা হয় ৰাইজৰ দল ৷ বৈঠালাংচ’ৰ ভানু সংস্কৃতি সংঘত জিলা খনৰ বিভিন্ন স্থানৰ শতাধিক লোকৰ উপস্থিতিত ৰাইজৰ দল গঠন কৰা হয় ৷ এই সভাত উপস্থিত থাকে ৰাইজৰ দলৰ মুখ্য আহ্বায়ক গিৰিশংকৰ গোস্বামী,কৃষক মুক্তি সংগ্ৰাম সমিতিৰ সভাপতি ৰাজু বৰা আৰু উপদেষ্টা বেদান্ত লস্কৰ,ৰাইজৰ দলৰ ৰাজ্যিক আহ্বায়ক নৱদ্বীপ বৰা ৷ ৩১ জনীয়া আহ্বায়ক কমিটিৰে পশ্চিম কাৰ্বি আংলং জিলাত ৰাইজৰ দল গঠন কৰা হয় ৷ ইপিনে, ৰাইজৰ দলৰ এই সভাত সভাপতিত্ব কৰে বিদ্যাছিং হাঞ্চে আৰু সভাৰ উদ্দেশ্য ব্যাখ্যা আগবঢ়াই মহাজন ক্ৰৱে ৷
আনহাতে, কৃষক মুক্তি সংগ্ৰাম সমিতিৰ সভাপতি ৰাজু বৰায়ে সাংবাদিকৰ আগত মন্তব্য কৰি কয়, অনাগত দিনত ৰাইজৰ দলে জিলাখনত থকা আটাইকেইটা বিধানসভাৰ সমষ্টিত ৰাইজৰ দলৰ প্ৰাৰ্থীক জয়ী কৰাবৰ বাবে আপ্ৰাণ চেষ্টা কৰিব ৷ তদুপৰি দিচপুৰত দলটো অধিষ্ঠিত হ’লে কাৰ্বি আংলঙৰ দীৰ্ঘদিনীয়া সমস্যা সমূহ দূৰ কৰাৰ লগতে দুৰ্নীতি মুক্ত জিলা গঠনত গুৰুত্ব প্ৰদান কৰিব বুলি মন্তব্য কৰে ৰাজু বৰায়ে ৷
লগতে পঢ়কঃ তৰুণ গগৈৰ মৃত্যুত আৱেগিক প্ৰাক্তন শিক্ষামন্ত্ৰী প্ৰেমধৰ বৰা
