ডিফু,২৪ মাৰ্চ: কাৰ্বি-কুকি সংঘাতৰ বলি হৈ ১৯ জনকৈ লোকে দুৰ্বৃত্তৰ হাতত প্ৰাণ বিসৰ্জন দিয়া ১৮ বছৰ উকলি গ'ল ৷ বুধবাৰে লাংভুকু ছাৰপ'টেৰণ গাঁৱৰ ঘটনাস্থলীত শ্বহীদ সকলৰ স্মৃতিত অনুষ্ঠিত হয় এক শ্ৰদ্ধাঞ্জলি অনুষ্ঠান ৷ বোকাজানৰ বিজেপি প্ৰাৰ্থী ডাঃ নোমল মমিন অনুষ্ঠানটোত মুখ্য অতিথি হিচাপে উপস্থিত থাকি ১৯ জনকৈ শ্বহীদৰ স্মৃতিত বন্তি প্ৰজ্বলন আৰু পুষ্পাঞ্জলিৰে গভীৰ শ্ৰদ্ধা নিবেদন কৰে ৷ শ্ৰদ্ধাঞ্জলি থলীত শ্বহীদ পৰিয়ালৰ লোকসকলে এক আৱেগিক পৰিৱেশৰ সৃষ্টি কৰে ৷ শ্বহীদসকলক সুঁৱৰি কান্দোনত ভাগি পৰে পৰিয়ালৰ লোক ৷
ডাঃ নোমল মমিনে ভাষণ প্ৰসংগত কয় যে, জাতিগত সংঘাত কংগ্ৰেছৰ দিনত হৈছিল বিজেপিৰ দিনত নহয় ৷ বিজেপিয়ে কেৱল উন্নয়নৰ ৰাজনীতি কৰে, সংঘাতৰ নহয় ৷ ৰাজনীতি হ’লে কেৱল উন্নয়নৰ ৰাজনীতি হ’ব লাগে ৷ কাৰ্বি-কুকি সংঘাতৰ বলি হোৱা শ্বহীদ পৰিয়ালৰ মেট্ৰিক-হায়াৰ ছেকেণ্ডাৰী উত্তীৰ্ণ হোৱা ল'ৰা-ছোৱালীক ডাঃ নোমল মমিনৰ নিজা খৰছত আই টি আইত অধ্যয়ন কৰাৰ সুবিধা কৰি দিব বুলি মন্তব্য কৰে ৷
২০০৪ চনৰ আজিৰ দিনটোতেই লাংভুকুত দূৰ্বৃত্তৰ হাতত মৃত্যুবৰণ কৰাৰ বাবে আজিৰ দিনটো কাৰ্বি আংলঙৰ বাবে 'ক’লা দিন" আখ্যা দিয়ে বিজেপিৰ প্ৰাৰ্থী গৰাকীয়ে ৷ ঘটনাস্থলীত স্মৃতিসৌধৰ লগতে পাৰ্ক নিৰ্মাণ কৰি উক্ত পাৰ্কত ১৯ গৰাকী শ্বহীদৰ ফটো সংৰক্ষণ কৰাৰ ব্যৱস্থা গ্ৰহণ কৰা হ’ব বুলিও কয় বোকাজানৰ বিজেপি প্ৰাৰ্থী গৰাকীয়ে ৷
ইপিনে লাংভুকু জলপ্ৰপাতৰ আন্তঃগাঁথনি আৰু নিৰ্মাণৰ বাবে অসম দৰ্শন আঁচনিৰ জৰিয়তে ৮ কোটি টকা আৱণ্টন দিয়া হৈছে ৷ এই বছৰত জলপ্ৰপাত পৰ্যটনথলী মুকলি কৰা হ’ব ৷ লাংভুকু পৰ্যটনস্থলীলৈ পৰ্যবেশিত হ’লে বিভিন্ন প্ৰান্তৰ পৰ্যটকে লাংভুকু পৰিদৰ্শন কৰিবলৈ আহিব ৷ লাংভুকু এলেকাৰ লোকসকলে ক্ষুদ্ৰ ব্যৱসায় কৰিও জীৱিকা নিৰ্বাহ কৰাৰ সম্বল বিচাৰি পাব বুলি কয় ডাঃ নোমল মমিনে ৷
লগতে পঢ়কঃ অখিলৰ সমৰ্থত শিৱসাগৰৰ ৰাজপথত সহস্ৰাধিক জনতা
