ডিফু, ২৮ জুলাই : বিজেপি শাসিত দুই পাৰ্বত্য জিলা কাৰ্বি আংলং (Karbi Anglong)আৰু পশ্চিম কাৰ্বি আংলঙত (West Karbi Anglong) বিৰোধী আঞ্চলিক দুই দলৰ মাজত হ'বলৈ গৈ আছে নতুন সমীকৰণ । বিজেপিৰ বিৰুদ্ধে ঐক্যবদ্ধভাৱে যুঁজ দিবলৈ ঐক্যবদ্ধ হ'ব দুটা আঞ্চলিক ৰাজনৈতিক দল ক্ৰমে এ এছ ডি চি (ASDC) আৰু এ পি এইছ এল চি (APHLC) ৷ চন্দ্ৰকান্ত টেৰাঙ নেতৃত্বাধীন স্বায়ত্তৰাজ্য দাবী সমিতি চমুকৈ এ এছ ডি চি (ASDC) আৰু জে আই কাথাৰ নেতৃত্বাধীন অল পাৰ্টী হীলছ লীডাৰ্চ কনফাৰেন্স চমুকৈ এ পি এইছ এল চি (APHLC) অগ্ৰসৰ হৈছে ঐক্যবদ্ধ হোৱাৰ দিশে ৷
বুধবাৰে ডিফুত দুয়োটা দলে আয়োজিত কৰা এক সংবাদমেলত এই কথা ঘোষণা কৰে নেতাসকলে ৷ এই সন্দৰ্ভত এ এছ ডি চি (ASDC) দলৰ সভাপতি চন্দ্ৰকান্ত তেৰাঙে কয় যে, সময়,পৰিস্থিতি আৰু ৰাইজৰ দাবীত দল দুটাই একত্ৰিত হোৱাৰ দিশে অগ্ৰসৰ হোৱাৰ সিদ্ধান্ত গ্ৰহণ কৰিছে ৷ পাহাৰীয়া জিলা দুখনত আঞ্চলিক শক্তিসমূহ একত্ৰিত হৈ যুঁজ দিয়াটো ৰাইজে বিচাৰিছে বাবেই তেনে দাবীৰ প্ৰতি সন্মান জনাই দল দুটাৰ মাজত একত্ৰিকৰণৰ প্ৰক্ৰিয়া আৰম্ভ হোৱা বুলি কয় সভাপতি গৰাকীয়ে ৷
সোমবাৰে দুয়োটা দলৰ মাজত হোৱা দীৰ্ঘ আলোচনাৰ সৰ্বসন্মত সিদ্ধান্ত মৰ্মে জিলা দুখনৰ মূল দাবী সন্দৰ্ভত ঐক্যবদ্ধভাৱে কাম কৰাৰ বাবে সিদ্ধান্ত গ্ৰহণ কৰিছে বুলি কয় নেতাগৰাকীয়ে ৷
