আজাৰা,১১ জুলাই: কৰ'ণাৰ আতংকৰ সমান্তৰালভাৱে ৰাজ্যত অব্যাহত আছে বানৰ তাণ্ডৱ । একে লেঠাৰিয়ে হৈ থকা ধাৰাষাৰ বৰষুণৰ ফলত অধিক ভয়াৱহ হৈ পৰিছে ৰাজ্যৰ বান পৰিস্থিতি । বানৰ এই তাণ্ডৱত ইতিমধ্যে মৃত্যু ঘটিছে বহু লোকৰ লগতে বন্য জীৱ জন্তু । পানীৰ মাজত আবদ্ধ বন্য জীৱ জন্তু সমূহে ওখ স্থানৰ সন্ধানত দিক বিদিক হেৰুৱাই গতি কৰিছে যি কোনো স্থানলৈ । ইয়াৰ মাজতে এইবাৰ ব্ৰহ্মপুত্ৰৰ বুকুয়েদি উটি আহিল এটা প্ৰকাণ্ড বনৰীয়া হাতী । ইয়াকে লৈ শনিবাৰে পুৱাৰ ভাগতে ব্ৰহ্মপুত্ৰৰ গাতে লাগি থকা পলাশবাৰী দখলা ক'লনীৰ নদীৰ পাৰত সমবেত হ'ল অসংখ্য লোক। মহাবাহু ব্ৰহ্মপুত্ৰৰ ভৰপানীত উটি আহিছে এই বনৰীয়া হাতীটো ।
স্থানীয় লোকে ধাৰণা কৰামতে কাজিৰঙাৰ পৰা পানীৰ প্ৰবল সোঁতত উটি আহি দখলা ক'লনীত নদীৰ পাৰত লাগি ধৰাৰ পিছত হাতীটোৱে পাৰলৈ উঠি আহে । ইয়াকে লৈ নদী পৰীয়া লোকসকলৰ মাজত এক আতংকময় পৰিৱেশৰ সৃষ্টি হয়। অৱশ্যে সোঁতত উটি অহাৰ ফলত ভাগৰুৱা হৈ পৰা বনৰীয়া হাতীটোক স্থানীয় একাংশ হৃদয়ৱান লোকে যোগান ধৰিলে খাদ্যবস্তু ।
সেই স্থানত আৰক্ষী আৰু বনবিভাগৰ লোক উপস্থিত হয় যদিও বাতৰি যুগুতোৱাৰ সময়লৈকে হাতীটোক সুৰক্ষিত স্থানলৈ স্থানান্তৰীত কৰিবৰ বাবে কোনো ব্যৱস্থা গ্ৰহণ কৰিব পৰা নাছিল । ইফালে যিকোনো মুহুৰ্তত অঞ্চলবাসীয়ে বনৰীয়া হাতীটোৰ আক্ৰমণৰ সন্দেহ কৰি আৰক্ষী আৰু বন বিভাগক শীঘ্ৰে ব্যৱস্থা গ্ৰহণ কৰিবলৈ জনালে আহ্বান ।
লগতে চাওকঃ কাৰাৰুদ্ধ কৃষক নেতাৰ উন্নত চিকিৎসা আৰু মুক্তিৰ দাবীত শিৱসাগৰত পথ অৱৰোধ
