কামৰূপ, 29 আগষ্টঃ ছয়গাঁৱৰ খৰখৰীত জব্দ সন্দেহযুক্ত টেংকাৰ ৷ গাঞ্জা থকাৰ সন্দেহত টেংকাৰখন জব্দ কৰে কেন্দ্ৰীয় চোৰাংচোৱা সংস্থাৰ এটি দলে ৷ ১৭ নং ৰাষ্ট্ৰীয় ঘাই পথত জব্দ কৰা টেংকাৰখনৰ নম্বৰ NL-01-AC-1527 ৷ উল্লেখ্য যে, জব্দকৃত টেংকাৰখনত বৃহৎ পৰিমাণৰ গাঞ্জা থকা বুলি গোপন সূত্ৰৰ পৰা খবৰ লাভ কৰিছিল কেন্দ্ৰীয় চোৰাংচোৱা সংস্থাই ৷ সেই অনুসৰি বুধবাৰৰ পুৱা ৬ বজাৰ পৰা গাড়ীখনৰ অনুসন্ধানত নামি পৰিছিল কেন্দ্ৰীয় চোৰাংচোৱা সংস্থাৰ এটি দল ৷ অৱশেষত বৃহস্পতিবাৰে গোৱালপাৰা দিশৰ পৰা গুৱাহাটীৰ দিশে গৈ থকা অৱস্থাত ছয়গাঁৱৰ খৰখৰীত কেন্দ্ৰীয় চোৰাংচোৱা সংস্থাৰ দলটোৱে স্থানীয় ছয়গাঁও আৰক্ষী থানা আৰু ৰাইজৰ সহযোগত জব্দ কৰিবলৈ সক্ষম হয় ৷ দলটোৱে বুধবাৰৰ পৰাই টেংকাৰখন সন্ধানত নামি পৰাৰ লগতে বৃহস্পতিবাৰে টেংকাৰখনৰ পাচ লৈছিল ৷
আনহাতে, টেংকাৰখনত চোৰাং গাঞ্জা থকা বুলি সন্দেহ কৰা হৈছে যদিও এই মূহুৰ্তলৈকে আচল তথ্য প্ৰকাশ কৰা নাই ৷ বৰ্তমান টেংকাৰখন ছয়গাঁও আৰক্ষী থানাত ৰাখি থোৱা হৈছে ৷ তাৰোপৰি টেংকাৰখনৰ চালক আৰু কৰ্মচাৰী নিমিষতে পলায়ন কৰে বুলি জানিবলৈ দিয়ে দলটোৱে ৷
