ৰঙিয়া, ৬ ফেব্ৰুৱাৰী: জীৱশ্ৰেষ্ঠ হোৱাৰ গৌৰৱত কালিমা সানি এইবাৰ নিষ্ঠুৰ লোকে অত্যাচাৰ চলালে নিৰীহ জন্তুৰ ওপৰত । ৰঙিয়াৰ পিতাম্বৰ হাটবজালীত সংঘটিত হ'ল এক চাঞ্চল্যকৰ ঘটনা । পিতাম্বৰ হাটবজালীত দুৰ্বৃত্তই হত্যা কৰিলে দুটা গৰু আৰু জ্বলাই দিলে গোহালিটো । শুক্ৰবাৰে নিশা সংঘটিত হয় এই ঘটনা । নিশা হঠাৎ গোহালিত জুই লগাত হুৱা-দুৱা লাগে । স্থানীয় লোকে জুই নুমুওৱাৰ চেষ্টা কৰে যদিও ব্যৰ্থ হয় ।
পিছত অগ্নি নিৰ্বাপক বাহিনীয়ে বহু চেষ্টাৰ অন্তত জুই নুমুৱাবলৈ সক্ষম হয় । আনহাতে, গোহালিটোৰ পিছফালে উদ্ধাৰ হয় দুটা মৃত গৰু । দুৰ্বৃত্তই গো-ধন দুটাক হানি-খুচি নৃশংসভাৱে হত্যা কৰা বুলি অনুমান কৰা হৈছে । ব্যক্তিগত শত্ৰুতাৰ বাবে দুৰ্বৃত্তই এনেধৰণৰ জঘন্য কাণ্ড সংঘটিত কৰিছে বুলি সন্দেহ কৰিছে স্থানীয় ৰাইজে । এই ঘটনাই সমগ্ৰ অঞ্চলত তীব্ৰ চাঞ্চল্যৰ সৃষ্টি কৰিছে । এই ঘটনাৰ উচিত তদন্ত কৰি দোষীক শাস্তি প্ৰদান কৰিবলৈ ৰাইজে আৰক্ষীক দাবী জনাইছে ।
