আৰক্ষীয়ে গাঁত খান্দি উলিয়ালে মৃতদেহ

মৰণোত্তৰ পৰীক্ষা নকৰাকৈয়ে গাঁতত পুতি থৈছিল পথ দুৰ্ঘটনাত নিহত অনিল বড়ো নামৰ এজন লোকৰ মৃতদেহ ৷ সেয়ে দণ্ডাধীশৰ উপস্থিতিত আৰক্ষীয়ে সমাধি খান্দি উলিয়াই আনিলে মৃতদেহ ৷

ৰঙিয়া, 2 নৱেম্বৰ: ৰঙিয়াৰ বৰকুৰিহাৰ অঞ্চলত সংঘটিত হৈছে নাভুত-নাশ্ৰুত কাণ্ড ৷ পথ দুৰ্ঘটনাত নিহত হোৱা বৰকুৰিহাৰ অনিল বড়ো নামৰ এজন লোকৰ গাঁতত পুতি থোৱা মৃতদেহ দণ্ডাধীশৰ উপস্থিতিত শনিবাৰে গাঁত খান্দি উলিয়াই আনে ৰঙিয়া আৰক্ষীয়ে ৷ অভিযোগ অনুসৰি মৰণোত্তৰ পৰীক্ষা নকৰাকৈয়ে গাঁত খান্দি পুতি থোৱা হৈছিল প্ৰায় ডেৰমাহ পূৰ্বে টেক্টৰৰ খুন্দাত গুৰুতৰ ভাবে আহত হৈ 4 দিন পূৰ্ৱে মৃত্যু হোৱা অনিল বড়ো নামৰ দিন হাজিৰা কৰা লোকজনৰ মৃতদেহ ৷ শনিবাৰে এই কথা ৰঙিয়া আৰক্ষীয়ে জানিব পাৰি দণ্ডাধীশৰ উপস্থিতিত গাঁতত পুতি থোৱা অৱস্থাত মৃত লোকজনৰ উৱলি যোৱা মৃতদেহ উদ্ধাৰ কৰি মৰণোত্তৰ পৰীক্ষাৰ বাবে জি এম চি এইচলৈ প্ৰেৰণ কৰে ৷

উল্লেখযোগ্য যে, দুৰ্ঘটনা সংঘটিত কৰা ট্ৰেক্টৰখনৰ চালককো আটক কৰিছিল আৰক্ষীয়ে, কিন্তু ইয়াৰ পাছতো কি কাৰণত মৰণোত্তৰ পৰীক্ষা নকৰাকৈ লোকজনৰ মৃতদেহ পৰিয়ালটোৱে এনেদৰে পুতি থৈছিল তাক লৈ এতিয়া ৰহস্যৰ সৃষ্টি হৈছে ৷ কোনো পক্ষৰ ভাবুকিৰ বাবে পৰিয়ালটোৱে এনে কাৰ্য কৰিছে নেকি সেই সন্দৰ্ভত আৰক্ষীয়ে ইতিমধ্যে তদন্ত আৰম্ভ কৰিছে ৷