কামৰূপ, 23 নৱেম্বৰঃ ৰাজ্যত পুনৰ সাংবাদিক আক্ৰমণৰ ঘটনা। আমিনগাঁৱত দুৰ্বৃত্তৰ আক্ৰমণৰ বলি হ'ল দুজনকৈ সাংবাদিক । বৈদ্যুতিন মাধ্যমৰ সাংবাদিক দুজন ক্ৰমে ৰন্টু বৈশ্য আৰু ৰূপজ্যোতি দাস। চাইল্ড লাইনে আমিনগাঁৱৰ ৰাষ্ট্ৰীয় আইন বিশ্ব বিদ্যালয়ৰ সমীপত এটা গেৰেজৰ পৰা শিশু শ্ৰমিক উদ্ধাৰ কৰাৰ বাতৰি সংগ্ৰহ কৰি থকা অৱস্থাতেই আক্ৰমণ কৰে সাংবাদিক দুগৰাকীক। গেৰেজৰ মালিক কৰ্মচাৰীৰ আক্ৰমণত গুৰুতৰভাৱে আহত হয় সাংবাদিকদ্বয়। সম্প্ৰতি আমিনগাঁও তোলাৰাম বাফনা কামৰূপ জিলা অসামৰিক চিকিৎসালয়ত চিকিৎসাধীন হৈ আছে সাংবাদিক দুজন।
আনহাতে,সাংবাদিকক আক্ৰমণ কৰা গেৰেজৰ মালিকৰ বিৰুদ্ধে আমিনগাঁও আৰক্ষী চকীত ৰুজু হৈছে গোচৰ। ঘটনাস্থলীত কামৰূপ জিলা আৰক্ষী অধীক্ষক পাৰ্থ সাৰথি মহন্ত আৰু উপ-আৰক্ষী অধীক্ষক কল্যান পাঠক উপস্থিত হৈ ঘটনা সন্দৰ্ভত আৰম্ভ কৰিছে তদন্ত। দোষী কৰায়ত্ত কৰি উচিত শাস্তি বিহাৰ প্ৰতিশ্ৰুতি প্ৰদান কৰে আৰক্ষী অধীক্ষক গৰাকীয়ে। ইফালে ঘটনা সংঘটিত কৰিয়েই পলায়ন কৰিছে দুৰ্বৃত্তৰ দলটো। সাংবাদিকক আক্ৰমণ কৰা ঘটনাক তীব্ৰ ভাষাৰে গৰিহণা দিছে কামৰূপ জিলাৰ বিভিন্ন দল-সংগঠনে।
লগতে পঢ়কঃসমস্যা মুক্ত হ'ব কস্তুৰবা গান্ধী বালিকা বিদ্যালয়ঃ প্ৰতিশ্ৰুতি স্থানীয় বিধায়কৰ
