গুৱাহাটী,13 আগষ্ট : নতুন ৰূপত সজাই তোলা হৈছে অসম বিধানসভাৰ চৌহদত থকা স্বাস্থ্য সেৱা কেন্দ্ৰটো ৷ নতুন ৰূপ দিয়া এই স্বাস্থ্য সেৱা কেন্দ্ৰটো শুকুৰবাৰে আনুষ্ঠানিক ভাৱে মুকলি কৰে মুখ্যমন্ত্ৰী ডঃ হিমন্ত বিশ্ব শৰ্মাই ৷ এই স্বাস্থ্য কেন্দ্ৰটোত এতিয়াৰে পৰা ২৪ ঘন্টাই চিকিৎসা সেৱা উপলব্ধ হ'ব ৷ লগতে সপ্তাহত পাঁচ দিনকৈ গুৱাহাটী চিকিৎসা মহাবিদ্যালয়ৰ পৰা অহা এগৰাকী বিশেষজ্ঞ চিকিৎসকে চিকিৎসা সেৱা প্ৰদান কৰিব ৷ 24 ঘন্টাই থাকিব 4 গৰাকীকে চিকিৎসক,8 গৰাকীকৈ নাৰ্চ আৰু চাৰি গৰাকী ফাৰ্মাচিষ্ট ৷
উল্লেখ্য যে, কেন্দ্ৰটো আনুষ্ঠানিকভাৱে মুকলি কৰা অনুষ্ঠানত উপস্থিত থাকে অসম বিধানসভাৰ অধ্যক্ষ বিশ্বজিৎ দৈমাৰী উপাধ্যক্ষ ডাঃ নোমল মমিন, স্বাস্থ্য মন্ত্ৰী কেশৱ মহন্ত,মন্ত্ৰী পীযুষ হাজৰিকা আৰু বিধায়ক সকল ৷ উক্ত অনুষ্ঠানতে অসম বিধান সভাৰ অধ্যক্ষ বিশ্বজিৎ দৈমাৰীয়ে আনুষ্ঠানিকভাৱে এক হেল্থ কাৰ্ডৰো উন্মোচন কৰে ৷ এই হেল্থ কাৰ্ডৰ জৰিয়তে প্ৰতিজন বিধায়ক আৰু তেওঁৰ পৰিয়াল তথা অসম বিধান সভাৰ প্ৰতিজন সদস্যই এই চিকিৎসালয়খনত চিকিৎসা সেৱাৰ সুবিধা লাভ কৰিব ৷
কেন্দ্ৰটোত ফিজিঅ' থেৰাপী,লেবৰেট'ৰী আদিৰো সুবিধা কৰি দিয়া হৈছে । তদুপৰি চিকিৎসা কেন্দ্ৰটো ঔষধালয়ৰো ব্যৱস্থা আছে ৷
লগতে পঢ়কঃ তীব্ৰ বাদানুবাদৰ অন্তত বিধানসভাত গৃহীত গো-সুৰক্ষা বিধেয়ক
