ৰঙিয়া,10 মে’ঃ ৰঙিয়াৰ বাঘবাৰী আৰু ম’হখলিৰ আঠ পৰিয়ালক ৰখা হৈছে হোম কোৱাৰেণ্টাইনত ৷ কৰ’ণা সংক্ৰমিত ব্যক্তিৰ সংস্পৰ্শলৈ অহাৰ বাবে স্বাস্থ্য বিভাগে পৰিয়ালকেইটাক ৰাখে কোৱাৰেণ্টাইনত ৷ উল্লেখ্য যে, ইতিমধ্যে মৃত্যুক সাৱটি লোৱা গুৱাহাটীৰ এগৰাকী কৰ’ণা আক্ৰান্তৰ শেষকৃত্যত অংশগ্ৰহণ কৰিছিল ৰঙিয়াৰ বিপুল কলিতা নামৰ ব্যক্তিজনে ৷ কলিতাৰ সংস্পৰ্শলৈ অহা আন সাতটা পৰিয়ালকো ৰখা হৈছে কোৱাৰেণ্টাইনত ৷ স্বাস্থ্য বিভাগৰ এটা দলে ব্যক্তিজনৰ পৰিয়ালৰ সকলো সদস্যকে হাতত ষ্টাম্প মাৰি কোৱাৰেণ্টাইন কৰে । এই ঘটনাৰ পাছতেই বৰ্তমান গাঁৱখনত সৃষ্টি হৈছে এক আতংকময় পৰিৱেশ ।
উল্লেখ্য যে, বি বৰুৱা কৰ্কট প্ৰতিষ্ঠানত কৰ্মৰত এগৰাকী কৰ্মচাৰীৰ ঘৰত বৃহস্পতিবাৰে মৃত্যু হোৱা এগৰাকী যুৱতীৰ মৃতদেহৰ পৰা সংগ্ৰহ কৰা Swab ৰ পৰীক্ষাত Covid 19 ৰ উপস্থিতি ধৰা পৰিছিল ৷ মহানগৰীত কৰ্মৰত ৰঙিয়াৰ বিপুল কলিতাই বন্ধুৰ সৈতে ভূতনাথত যুৱতীগৰাকীৰ মৃতদেহ সৎকাৰত অংশগ্ৰহণ কৰাৰ খবৰ ৰাইজে লাভ কৰে ৷ এই কাৰ্যৰ পিছতে কলিতা ৰঙিয়াস্থিত ঘৰলৈ আহে ৷
ইফালে বিষয়টো পোহৰলৈ অহাৰ পিছত ব্যক্তি দুজনক শিঙিমাৰীৰ এখন চিকিৎসালয়ত কোৱাৰেণ্টাইন কৰা হৈছে । লগতে পৰিয়ালৰ লোকে ব্যক্তিজন কৰ’ণা আক্ৰান্ত হৈ মৃত্যুবৰণ কৰা যুৱতীৰ সৎকাৰত অংশগ্ৰহণ কৰাৰ কথা অস্বীকাৰ কৰে ৷ বৰ্তমান পৰিয়ালটো একাংশ গাঁওবাসীৰ ককৰ্থনাৰ সন্মুখীন হৈ মানসিক দুঃচিন্তাত ভুগিছে ৷
লগতে চাওকঃ ৰঙিয়া আদৰ্শ চিকিৎসালয়ত দহগৰাকীক কোৱাৰেণ্টাইন
