ছয়গাঁও ২৭ জুলাই : জনস্বাস্থ্য কাৰিকৰী বিভাগৰ বকো উপ সংমণ্ডলৰ অধীনস্থ কুকুৰমাৰা পানী যোগান আঁচনিৰ পৰা বিগত প্ৰায় দুবছৰে পানী যোগান ব্যাহত থকাত বৃহত্তৰ কুকুৰমাৰা অঞ্চলৰ ৰাইজে বিশুদ্ধ খোৱাপানীৰ পৰা বঞ্চিত হৈ আছে ৷ বিভাগটোৰ বিষয়া কৰ্মচাৰীৰ অকৰ্মণ্যতা তথা অমনোযোগিতাৰ বাবেই দীৰ্ঘদিন ধৰি পানী যোগান আঁচনিটোৰ পৰা পানী যোগান বন্ধ হৈ আছে বুলি অভিযোগ উত্থাপিত হৈছে ৷ জানিব পৰামতে কুকুৰমাৰাৰ এই পানী যোগান কেন্দ্ৰটোৰ বিদ্যুত যোগানৰ ক্ষেত্ৰত কিছু ব্যাহত হোৱাৰ আচিলা লৈয়েই পানী যোগান বন্ধ হৈ আছে ৷ পানী যোগান কেন্দ্ৰৰ এখন বিদ্যুতৰ বৰ্ড বেয়া হোৱাৰ পিছত বিভাগীয় বিষয়া কৰ্মচাৰীয়ে ভাল কৰাৰ ব্যৱস্থা গ্ৰহণ নকৰাৰ বাবে এনেদৰে দীৰ্ঘদিন ধৰি পানী যোগান বন্ধ আছে ৷
পানী যোগান কেন্দ্ৰটোত নিয়োজিত কৰ্মচাৰী গৰাকীয়ে বাৰাম্বাৰ উক্ত কামখিনি কৰাৰ বাবে বকো সংমণ্ডলৰ তথা ছয়গাঁও অঞ্চলৰ দায়িত্বত থকা বিষয়াক অনুৰোধ জনাই অহাৰ পিছতো তেওঁলোকে বিদ্যুতৰ কামখিনি মেৰামতি কৰা নাই ৷ যাৰ ফলত এতিয়া পানী যোগান কেন্দ্ৰটোৰ বহু অংশ সা-সঁজুলি মামৰে ধৰাৰ উপক্ৰম ঘটিছে ৷ আনহাতে পানী যোগান কেন্দ্ৰটোৰ পানী শোধন কৰা যন্ত্ৰাংশ বেয়া হোৱাৰ ফলত অঞ্চলটোৰ ৰাইজক পানী শোধন নকৰাকৈয়ে যোগান ধৰি আহিছিল বুলি স্থানীয় ৰাইজে জানিবলৈ দিছে ৷ ইফালে প্ৰায় দুবছৰে পানী যোগান ব্যহত থকাত পানীৰ টেপ সমূহো মাটিত পোত যাবলৈ আৰম্ভ কৰিছে ৷ স্থানীয় ৰাইজে উক্ত পানী যোগান কেন্দ্ৰটো অতিশীঘ্ৰে কাৰ্যক্ষম কৰি তুলিবলৈ বিভাগীয় কৰ্তৃপক্ষক দাবী জনাইছে ৷
