ৰঙিয়া, 27 আগষ্ট : 'চৰকাৰী ভূমিত যিসকল লোকে বেদখল কৰি আছে, সেই সকলে অতি সোনকালে চৰকাৰী ভূমিখিনি এৰি দিয়ক ৷ অন্যথা চৰকাৰে ব্যৱস্থা গ্ৰহণ কৰিব চৰকাৰী ভূমিত বেদখল কৰা লোকসকলৰ বিৰুদ্ধে ।' প্ৰধানমন্ত্ৰী আবাস যোজনাৰ অধীনত নিৰ্মাণ হোৱা এটি ঘৰৰ উদ্বোধন কৰাৰ পাচতে এইদৰে মন্তব্য প্ৰকাশ কৰিলে বিধায়ক দিগন্ত কলিতাই ৷
কমলপুৰ সমষ্টিৰ বিধায়ক দিগন্ত কলিতাই কয়, ৰঙিয়াৰ হিৰাগাটা অঞ্চলত থকা বহু চৰকাৰী ভূমিত বেদখল কৰিছে একাংশ লোকে । সেই লোকসকলে যাতে অতি সোনকালে বেদখল কৰি থকা চৰকাৰী মাটিখিনি এৰি দিয়ে ৷
লগতে পঢ়ক: উত্তৰ পূৰ্বাঞ্চলৰ প্ৰথমটো সৰ্ববৃহৎ জাৱৰ নিষ্কাষণ প্ৰকল্প উদ্বোধন
চৰকাৰী মাটিখিনি যদি সেই লোকসকলে এৰি নিদিয়ে তেন্তে অতি সোনকালে চৰকাৰ ফালৰ পৰা ব্যৱস্থা গ্ৰহণ কৰা হ'ব ৷ ইতিমধ্যে চৰকাৰী সংশ্লিষ্ট বিভাগৰ সৈতে এই বিষয়ত আলোচনা কৰা হৈছে ৷ অতি সোনকালে সেই লোক সকলক উচ্ছেদ কৰি সেই ভূমি অন্য লোকক চৰকাৰে উচৰ্গা কৰিব বুলি মন্তব্য প্ৰকাশ কৰে বিধায়ক দিগন্ত কলিতাই ।
উল্লেখ্য যে, কমলপুৰ সমষ্টিৰ অন্তৰ্গত ৰঙিয়া নগৰৰ ৮ নং ৱাৰ্ডত প্ৰধানমন্ত্ৰী আবাস যোজনাৰ অধীনত নিৰ্মাণ হোৱা এটি ঘৰ শুকুৰবাৰে উদ্বোধন কৰে বিধায়ক দিগন্ত কলিতাই ৷ উন্নয়নৰ সন্দৰ্ভত তেওঁ কয়, ৰঙিয়া অসমৰ ভিতৰতে দ্বিতীয়খন উন্নত চহৰ হ'বলৈ গৈ আছে । ৰঙিয়াৰ অধিকাংশ পথেই এতিয়া বহু উন্নত বুলি মন্তব্য প্ৰকাশ কৰে বিধায়ক গৰাকীয়ে ৷
লগতে পঢ়ক: বিজেপিৰ অপৰাধ বিৰোধী মেচিনত সোমালেই সকলো নিকা হৈ পৰে : কংগ্ৰেছ
