ছয়গাঁও,5 চেপ্তেম্বৰঃ বৃহস্পতিবাৰে ছয়গাঁৱৰ মাকেলিস্থিত কলহী নৈত এগৰাকী মহিলাৰ মৃতদেহ উদ্ধাৰ কৰা হয় ৷ মৃত মহিলা গৰাকী পূৱ মাকেলি গাঁৱৰ মন্টু কলিতাৰ পত্নী মীৰা কলিতা বুলি চিনাক্ত কৰা হৈছে ৷
জানিব পৰামতে যোৱা মঙলবাৰে পূৱা কলহী নৈত গা ধুবলৈ গৈ সলিল সমাধি ঘটিছিল মহিলা গৰাকীৰ ৷ মহিলা গৰাকী উক্তদিনা নৈৰ বুকুত সন্ধানহীন হৈ পৰাৰ পিচৰে পৰা স্থানীয় লোকৰ লগতে এন ডি আৰ এফৰ ডুবাৰুৰ দলেও মহিলা গৰাকীৰ সন্ধানত কলহী নৈত অভিযান চলাইছিল ৷ কিন্তু এন ডি আৰ এফৰ ডুবাৰু দলটোৱে মহিলা গৰাকীৰ মৃতদেহ উদ্ধাৰ কৰিবলৈ সক্ষম হোৱা নাছিল ৷ ইফালে বৃহস্পতিবাৰে পূৱা মহিলা গৰাকী সন্ধানহীন হোৱা ঠাইৰ কিছু দূৰৈত নৈত উপঙি থকা অৱস্থাত স্থানীয় লোকে মহিলা গৰাকীৰ মৃতদেহটো প্ৰত্যক্ষ কৰি ছয়গাঁও আৰক্ষীক খবৰ দিয়ে ৷ লগে লগে ছয়গাঁও আৰক্ষীৰ এটি দল ঘটনাস্থলীত উপস্থিত হৈ মহিলা গৰাকীৰ মৃতদেহটো উদ্ধাৰ কৰি ছয়গাঁও থানালৈ লৈ যায় ৷
