ছয়গাঁৱৰ ৰে'ল ক্ৰছিঙৰ কালভাৰ্টে জীয়াতু ভুগাইছে ৰাইজক

ছয়গাঁৱৰ গোৱৰ্ধনৰ পৰা গণকপাৰালৈ যোৱা পথটোৰ গোৱৰ্ধন হাস্পতালৰ ওচৰত নিৰ্মাণ কৰা কালভাৰ্টটোৰ পথত জমা হোৱা পানী সমূহ মাজে সময়ে ৰে’ল বিভাগে সিচাঁৰ ব্যৱস্থা কৰে যদিও পথটো যথেষ্ট দ হোৱা বাবে পথাৰৰ পানী আহি পুনৰ পথটো বুৰাই পেলাই ৷ সেয়েহে স্থানীয় ৰাইজে পথটো উন্নত পদ্ধতিৰে নিৰ্মান কৰি যাতায়তৰ উপযোগী কৰি তুলিবলৈ দাবী জনাইছে ৷

ছয়গাঁও,28মে': ৰে’লপথ সমূহৰ লেভেল ক্ৰচিঙৰ ঠাইত কালভাৰ্ট দিয়াৰ পিচত এতিয়া একাংশ কালভাৰ্ট হৈ পৰিছে ৰাইজৰ বাবে মৰণ ফান্দ ৷ ছয়গাঁও সমষ্টিৰ দক্ষিণ পাৰেৰে যোৱা কামাখ্যা-যোগীঘোপা ৰে’ল পথটোৰ লেভেল ক্ৰচিং সমূহ বন্ধ কৰি তাৰ ঠাইত কালভাৰ্ট নিৰ্মান কৰি পথ নিৰ্মাণ কৰি দিয়া হৈছে যদিও এই পথ সমূহে ৰাইজক অধিক জুৰুলাহে কৰিছে ৷ কালভাৰ্টৰ তলেৰে নিৰ্মাণ কৰা পথ সমূহ সছৰাচৰ থকা পথ সমূহতকৈ চাপৰ হোৱাত গোটেই বাৰিষাৰ সময়ত পথটো পানীত বুৰ গৈ থাকে ৷ যাৰ ফলত পথটোৰে যাতায়তৰ ক্ষেত্ৰত জীয়াতু ভুগি আহিছে সংশ্লিষ্ট এলেকাৰ ৰাইজে ৷ ইয়াৰ পাচতে ৰাইজে উক্ত পথটো পুনৰ বিজ্ঞানসন্মতভাৱে নিৰ্মান কৰিবলৈ বিভাগীয় কৰ্তৃপক্ষক দাবী জনাইছে ৷