ৰঙিয়া, ১১ জানুৱাৰী: সমগ্ৰ ৰাজ্যত চলিছে মাঘ বিহুৰ প্ৰস্তুতি । বিধে বিধে পিঠা, লাৰু তৈয়াৰ কৰিছে গৃহিণীসকলে । সমান্তৰালকৈ বজাৰত উভৈনদী হৈ পৰিছে ভোগৰ সামগ্ৰী । বিভিন্ন স্থানত আয়োজন কৰা হৈছে ভোগালী মেলা । ৰঙিয়াৰ ভট্টপাৰাতো চাৰিদিনীয়াকৈ অনুষ্ঠিত হৈছে ভোগালী মেলা । এই মেলাত উপলব্ধ হৈছে চুঙা পিঠা, নাৰিকলৰ লাৰু, তিলৰ লাৰু, চিৰা, দৈ, সান্দহ আদি বিভিন্ন ধৰণৰ অসমীয়া পৰম্পৰাগত খাদ্য সম্ভাৰ । বজাৰৰ তুলনাত যথেষ্ট কম মূল্যত ভোগালী মেলাত সামগ্ৰীসমূহ বিক্ৰী কৰা বাবে গ্ৰাহকৰ ভিৰ হোৱা পৰিলক্ষিত হৈছে । গাঁৱৰ ঘৰত তৈয়াৰ কৰা বিহুৰ পিঠা-পনা মেলাখনত উভৈনদী হৈ পৰিছে ।
আনহাতে, সময়ৰ অভাৱত নিজে তৈয়াৰ কৰাৰ পৰিৱৰ্তে মেলাখনৰ পৰাই সকলো খাদ্য সামগ্ৰী ক্ৰয় কৰিবলৈ পাই উৎফুল্লিত হৈ পৰিছে গ্ৰাহকসকল । মেলাখনত বিশেষকৈ চুঙা পিঠা ক্ৰয় কৰাৰ ক্ষেত্ৰত গ্ৰাহকে অধিক গুৰুত্ব দিয়া দেখা গৈছে । ভোগালী মেলাখনত আন সামগ্ৰীসমূহৰ লগতে ক'লা চাউল, ৫ বিধ চিৰা, কুঁহিয়াৰৰ উৎকৃষ্ট মানৰ গুৰ আৰু ক্ৰীম বিক্ৰী কৰা হৈছে বুলি জানিবলৈ দিছে আয়োজকসকলে ।
লগতে পঢ়ক:আকাশলংঘী মূল্যবৃদ্ধি স্বত্বেও ভোগালীৰ বজাৰত গ্ৰাহকৰ ভিৰ
