ৰঙিয়া,২৩ মাৰ্চ: শাসকীয় দলৰ প্ৰাৰ্থীৰ সমান্তৰালকৈ মহাজোঁট সমৰ্থিত প্ৰাৰ্থীসকলেও নিৰ্বাচনী প্ৰচাৰ তীব্ৰতৰ কৰি তুলিছে । মঙলবাৰে ৰঙিয়াৰ কনিহাত চিপিআই(এম) ৰ প্ৰাৰ্থী ডাঃ ভগৱান দেৱ মিশ্ৰই নিৰ্বাচনী প্ৰচাৰ চলায় । ৫৭ নং বিধানসভা সমষ্টিত ৮৫ হাজাৰ ভোট লাভ কৰি তেওঁ জয়ী হ'ব বুলি দাবী কৰে ।
লগতে মহাজোঁট সমৰ্থিত প্ৰাৰ্থী গৰাকীয়ে জলসিঞ্চন মন্ত্ৰী তথা ৰঙিয়া বিধানসভা সমষ্টিৰ বিজেপি প্ৰাৰ্থী ভৱেশ কলিতাক তীব্ৰ সমালোচনা কৰে । তেওঁ কয় যে, ভৱেশ কলিতাই কিমান সাঁতুৰিব পাৰে সেয়া নিৰ্বাচনৰ বিষয় নহয় । নিৰ্বাচন এক ৰাজনৈতিক সংগ্ৰাম । লগতে ৰাজনৈতিক সংগ্ৰামত সাঁতুৰবিদ হোৱাৰ প্ৰয়োজন নাই বুলিও তেওঁ মন্তব্য কৰে ।
আনহাতে, মন্ত্ৰী ভৱেশ কলিতাই মহাজোঁটৰ প্ৰাৰ্থী ডাঃ ভগৱান দেৱ মিশ্ৰক উদ্দেশ্যি অশ্লীল বাক্য প্ৰয়োগ কৰাৰ প্ৰসংগত প্ৰতিক্ৰিয়া ব্যক্ত কৰি মিশ্ৰই কয় যে, তেনেকুৱা শব্দ কোৱাতো দূৰৰ কথা, শুনাটোও অশালীন । সংস্কৃতিৰ পৰিপন্থী কাম তেওঁ কৰিব নোৱাৰে বুলিও স্পষ্ট কৰি দিয়ে । বিজেপিক সমালোচনা কৰি তেওঁ কয় যে, 'বৰ্তমান বিজেপি দলৰ কোনো আদৰ্শ নাই । কিয়নো, বৰ্তমান বিজেপিত অন্য দলৰ পৰা অহা লোকেহে ভিৰ কৰিছে' ।
