ৰঙিয়া, ৮ ফেব্ৰুৱাৰী: এতিয়াৰে পৰা ঘৰতে বহি নতুনকৈ বিদ্যুৎ সংযোগৰ বাবে আবেদন জনাব পাৰিব গ্ৰাহকে । অনলাইনযোগে যাৱতীয় সকলো কাম-কাজ সম্পন্ন কৰিব শক্তি বিভাগে । ৰঙিয়াত অসম শক্তি বিতৰণ কোম্পানী লিমিটেডৰ বিষয়াই এক সংবাদমেল সম্বোধন কৰি এই কথা প্ৰকাশ কৰে । বিল পৰিশোধ তথা অভিযোগ দাখিলৰ ক্ষেত্ৰতো সৰলীকৰণৰ বাবে বিশেষ পদক্ষেপ গ্ৰহণ কৰিব বিভাগীয় কৰ্তৃপক্ষই ।
ৰঙিয়া প্ৰেছ ক্লাবত সম্বোধন কৰা সংবাদমেলত চিজিএম অভিজিৎ শৰ্মা বৰুৱাই কয় যে,গ্ৰাহক সেৱা উন্নীত কৰাৰ বাবে এই পদক্ষেপ গ্ৰহণ কৰা হৈছে । আনহাতে,অঘটন সংঘটিত হোৱাৰ ক্ষেত্ৰত প্ৰতিক্ৰিয়া প্ৰকাশ কৰি তেওঁ কয় যে, ২০১৮ বৰ্ষত ৩৫৯ জন লোকৰ মৃত্যু হোৱাৰ বিপৰীতে ২০১৯ বৰ্ষত ১৫০ জনলৈ হ্ৰাস পায় । লগতে তেওঁ কয় যে,উপভোক্তাৰ সমস্যা সমাধানৰ বাবে অধিক গুৰুত্ব দিব অসম শক্তি বিতৰণ কোম্পানী লিমিটেডে ।
আধুনিক প্ৰযুক্তিৰে সমৃদ্ধ এপিডিচিএলে নতুন বিদ্যুৎ সংযোগৰ বাবে অনলাইন ব্যৱস্থাৰে গ্ৰাহকক সেৱা আগবঢ়োৱা কাম আৰম্ভ কৰিছে বুলি জানিবলৈ দিয়ে অভিজিত শৰ্মা বৰুৱাই । সংবাদমেলত এপিডিচিএলৰ কেইবাগৰাকী শীৰ্ষ বিষয়াই অংশগ্ৰহণ কৰাৰ লগতে বিভাগটোৱে গ্ৰহণ কৰা বিভিন্ন আঁচনি সন্দৰ্ভতো তথ্য দাঙি ধৰে । এই নতুন ব্যৱস্থাই গ্ৰাহকক যথেষ্ট সকাহ দিব বুলি আশাবাদী বিভাগীয় কৰ্তৃপক্ষ ।
