গুৱাহাটী, 12 মে': মুম্বাইৰ পৰা আহি অৱশেষত গুৱাহাটীত উপস্থিত হ'ল জনপ্ৰিয় শিল্পী জুবিন গাৰ্গ । মাজনিশা প্ৰায় ২.৩০ বজাত শিল্পী গৰাকী মুম্বাইৰ পৰা আহি উপস্থিত হয় সৰুসজাই ষ্টেডিয়ামৰ কোৱাৰেইণ্টাইন চেণ্টাৰত।
তাত স্বাস্থ্য পৰীক্ষা সম্পন্ন হোৱাৰ পাচত শিল্পী গৰাকীক হোটেল ৰেডিছন ব্লুলৈ কোৱাৰেন্টাইনৰ বাবে যায় । 14 দিনৰ বাবে ৰেডিছন ব্লুত কোৱাৰেন্টাইন হৈ থাকিব জুবিন গাৰ্গ আৰু মুম্বাইৰ পৰা একেখন বাছেৰে অহা তেওঁৰ পত্নী গৰিমা শইকীয়া গাৰ্গ আৰু দুই সতীৰ্থ ।
দেশজুৰি লক্ ডাউন চলি থকাৰ ফলত পত্নীসহ মুম্বাইত আবদ্ধ হৈ আছিল শিল্পী গৰাকী। প্ৰায় দুমাহ পূৰ্বে গুৱাহাটীত এক অনুষ্ঠানত হঠাৎ অসুস্থ হৈ পৰা শিল্পী গৰাকী নেম কেয়াৰ হাস্পতালত কেইবা ধৰি চিকিৎসাধীন হৈ আৰোগ্য লাভ কৰি মুম্বাইলৈ জিৰণি ল'বলৈ গৈছিল ।
ইয়াৰ মাজতে কৰ'ণা ভাইৰাছৰ আতংকই দেখা দিয়াত দেশজুৰি 25 মাৰ্চৰ পৰা আৰম্ভ হয় লক্ ডাউন। লক্ ডাউনৰ ফলত পত্নী আৰু দুগৰাকী সতীৰ্থসহ মুম্বাইতে বহু দিন ধৰি আবদ্ধ হৈ আছিল জুবিন গাৰ্গ ।
ৰাজ্য চৰকাৰৰ সহযোগত যোৱা শুকুৰবাৰে শিল্পী গৰাকীয়ে পত্নী আৰু সতীৰ্থসহ এক বিশেষ বাছ যোগে গুৱাহাটী অভিমুখে যাত্ৰা কৰিছিল।
লগতে পঢ়ক : ন-প্ৰভাতৰ সুখৰ কিৰণ জানমণিৰ চোতালত !
