গুৱাহাটী, ৮ ফেব্ৰুৱাৰী: দুয়োজনেই এসময়ত আছিল দুটাকৈ ছাত্ৰ সংগঠনৰ দুজনকৈ অত্যন্ত প্ৰভাৱশালী নেতা । সদৌ অসম ছাত্ৰ সন্থা আৰু সদৌ অসম চাহ জনজাতি ছাত্ৰ সন্থাৰ নেতৃত্ব বহন কৰিছিল দুয়োজনে । ছাত্ৰ ৰাজনীতিৰ পৰা পোনে পোনে আহি যোগ দিছিল সংসদীয় ৰাজনীতিত । কেৱল যোগ দিয়াই নহয়,একে কোবে আহি দিছপুৰত মন্ত্ৰী হোৱাৰো সৌভাগ্য উদয় হৈছিল দুয়োৰে । কিন্তু বৰ বেছি দিন মন্ত্ৰী হোৱাৰ আমেজ দুয়োজনৰ এজনেও ল'ব নোৱাৰিলে ।
এই দুজন নেতা হৈছে তপন কুমাৰ গগৈ আৰু পল্লৱলোচন দাস । দলৰ সিদ্ধান্ত মানি বিগত লোকসভা নিৰ্বাচনত নিজৰ ইচ্ছাৰ বিৰুদ্ধে হ'লেও অৱতীৰ্ণ হ'বলগীয়া হ'ল আৰু দিছপুৰক বিদায় দি সাংসদ হৈ দিল্লী পালেগৈ । কিন্তু ৰাজ্য এখনৰ মন্ত্ৰী হৈ থকা আৰু পাঁচ শতাধিক সাংসদৰ মাজত এজন সাংসদ হৈ থকাৰ মাজত বহুত পাৰ্থক্য । সেয়েহে, এতিয়া সুযোগ আহোতেই পুনৰ দিছপুৰলৈ উভতিব বিচাৰিছে দুয়োজনে । ৰাজ্যিক বিজেপিৰ সূত্ৰ অনুসৰি,দুয়োৱে পুনৰ এৰি থৈ যোৱা সমষ্টিক্ৰমে সোণাৰি আৰু ৰঙাপাৰাৰ পৰা নিৰ্বাচন খেলাৰ মন মেলিছে ।
ইতিমধ্যে,দলৰ ৰাষ্ট্ৰীয় নেতৃত্বকো এই ইচ্ছাৰ কথা ব্যক্ত কৰিছে দুয়োৱে । কিন্তু ৰাজহুৱাকৈ মুখ খুলিব খোজা নাই । ইপিনে,দুয়োৱে পুনৰ বিধানসভা নিৰ্বাচনত প্ৰাৰ্থিত্ব লাভ কৰা বিষয়টোত একপ্ৰকাৰ হেঙাৰ হৈ থিয় দিছে দলৰ এক গুৰুত্বপূৰ্ণ সিদ্ধান্তই । ইতিমধ্যে,দলীয়ভাৱে সিদ্ধান্ত লৈ থোৱা আছে যে,এইবাৰৰ বিধানসভা নিৰ্বাচনত বিজেপিৰ ৰাজ্যিক সমিতিৰ সাধাৰণ সম্পাদকৰ পদত থকা কাকোৱেই প্ৰাৰ্থিত্ব দিয়া নহ'ব । তেওঁলোকে দলৰ হকে কাম কৰিব লাগিব ।
সেই অনুসৰি,তপন কুমাৰ গগৈ আৰু পল্লৱলোচন দাসক ইতিমধ্যে বিজেপিৰ ৰাজ্যিক সাধাৰণ সম্পাদকৰ দায়িত্ব ন্যস্ত কৰি থোৱা হৈছে । এতিয়া যদি দুয়োকে পুনৰ প্ৰাৰ্থিত্ব দিয়া হয় তেন্তে দলৰ সেই সিদ্ধান্ত সলাব লাগিব । গতিকে মনে বিচাৰিলেই যে এই দুই প্ৰাক্তন ছাত্ৰ নেতাই দিল্লী এৰি দিছপুৰলৈ ঘূৰি আহিব পাৰিব সেয়াও নিশ্চিতভাৱে ক'ব নোৱাৰি ।
লগতে পঢ়ক: গুৱাহাটীত মুকলি হ'ল মহিলাৰ ৰাষ্ট্ৰীয় পৰ্যায়ৰ মঞ্চ ‘ৱ’মানিয়াছ’
