গুৱাহাটী: বছৰটোৰ শেষত মুখ্যমন্ত্রী হিমন্ত বিশ্ব শৰ্মা চৰকাৰে 'বিকাশৰ ১২ দিন' কাৰ্যসূচীৰে ৰাজ্যজুৰি চমক সৃষ্টি কৰিলে । ১১ ডিচেম্বৰৰ পৰা আৰম্ভ হোৱা অসম চৰকাৰৰ বিকাশৰ ১২ দিনীয়া বিয়াগোম কাৰ্যসূচীৰ ইতিমধ্যে অন্ত পৰিল । গুৱাহাটীত মুখ্যমন্ত্ৰী হিমন্ত বিশ্ব শৰ্মাই আনুষ্ঠানিকভাৱে আৰম্ভ কৰা বিকাশৰ ১২ দিনীয়া কাৰ্যসূচীৰ ডিব্ৰুগড়ত মুখ্যমন্ত্রীয়ে নিজেই সামৰণি মাৰিলে । বিগত ১২ দিনত মুখ্যমন্ত্রীৰ লগতে মন্ত্রীসকলে ৰাজ্যৰ বিভিন্ন জিলাত বিকাশৰ ১২ দিনৰ কাৰ্যসূচী ৰূপায়ণ কৰিলে ।
২৩ ডিচেম্বৰত বিকাশৰ ১২ দিন কাৰ্যসূচীৰ সামৰণি মাৰি মুখ্যমন্ত্ৰীয়ে সামাজিক মাধ্যমযোগে কয়,"'বিকাশৰ ১২ দিন' শীৰ্ষক কাৰ্যসূচীৰ আজি ডিব্ৰুগড়ত আনুষ্ঠানিকভাৱে যৱনিকা পৰে । এই অনুষ্ঠানৰ জৰিয়তে আমি হাজাৰ হাজাৰ লোকক অনুদান আৰু উদগনি বিতৰণৰ প্ৰয়াস কৰিছিলোঁ । এই প্ৰচেষ্টাই জনসাধাৰণৰ পৰা যথেষ্ট সমৰ্থন লাভ কৰাৰ উপৰি আমি অসমৰ জনতা জনাৰ্দনক দিয়া প্ৰতিশ্ৰুতি পালন কৰিবলৈ সক্ষম হৈছো ।"
কি আছিল বিকাশৰ ১২ দিনীয়া কাৰ্যসূচী:
দৈনন্দিন অসম চৰকাৰে কৰি অহা কামৰ বিপৰীতে কিবা নতুনত্ব আছিল নেকি বিকাশৰ ১২ দিনৰ এই বিশেষ কাৰ্যসূচীত । আমাৰ এক বিশেষ প্ৰতিবেদন ।
লক্ষ্য কেৱল হিতাধিকাৰী:
ক্ষমতালৈ অহাৰ পাছৰে পৰা কেৱল হিতাধিকাৰী সৃষ্টিত বিশেষ গুৰুত্ব দিয়া চৰকাৰখনে বিকাশৰ ১২ দিনীয়া কাৰ্যসূচীতো লক্ষ্য আছিল কেৱল হিতাধিকাৰী । ইয়াৰ বাবে ৰাজ্যজুৰি বিশাল সভাৰ আয়োজন কৰা হ’ল আৰু এই আয়োজনৰ নামত ব্যয় কৰা হ'ল কোটি কোটি টকা ।
অনুদান আৰু উদগনিৰ বাৰ দিন:
লক্ষণীয় বিষয় যে বিকাশৰ ১২ দিনত চৰকাৰখনে ৰাজ্যত অনুদান আৰু উদগনি বিতৰণ কৰিলে । এই কথা মুখ্যমন্ত্রীয়ে সামাজিক মাধ্যমত দিয়া পোষ্টে স্পষ্ট কৰিছে । অৱশ্যে ১২ দিনৰ কাৰ্যসূচীসমূহেও সেই কথাই প্ৰতিফলিত কৰিছে । শিক্ষাৰ্থীৰ পৰা বয়োজ্যেষ্ঠজনলৈকে বিভিন্ন স্তৰৰ লোকৰ মাজত হিতাধিকাৰীৰূপে অনুদান দিয়াহে পৰিলক্ষিত হ'ল বিকাশৰ ১২ দিনত । এই সময়ছোৱাত কোনো আন্তঃগাঁথনি উন্নয়নমূলক কাম হাতত লোৱা পৰিলক্ষিত নহ'ল ।
আনহাতে কোনোধৰণৰ উৎপাদনশীল আঁচনি হাতত লোৱাও পৰিলক্ষিত নহ'ল । কেৱল হিতাধিকাৰীমূলক আঁচনিৰে ৰাজ্যৰ বিভিন্ন প্ৰান্তত চৰকাৰে বিকাশৰ ১২ দিন কাৰ্যসূচী পালন কৰিলে ।
বিকাশৰ ১২ দিনত ৰাজ্যৰ ৩২ লাখ হিতাধিকাৰী উপকৃত:
লক্ষ্যণীয় বিষয় যে মুখ্যমন্ত্ৰী হিমন্ত বিশ্ব শৰ্মাই বিকাশৰ ১২ দিনত ৩২ লাখ হিতাধিকাৰী উপকৃত হোৱা বুলি নিজেই সদৰী কৰিছে । এই ৩২ লাখ লোকে বিভিন্ন আঁচনিৰ অধীনত সুবিধা লাভ কৰিছে । বিকাশৰ ১২ দিনত ২০ লাখ নতুন ৰেচন কাৰ্ড বিতৰণ কৰা হৈছে । সেইদৰে ৬ লাখ বানপীড়িতক সাহাৰ্য প্ৰদান কৰা হৈছে এই কেইদিনত । আনহাতে মেধাৱী শিক্ষাৰ্থীক স্কুটী, চাইকেল আৰু অন্যান্য সাহাৰ্য প্ৰদান কৰা হৈছে ।
নাৰী শক্তিলৈ বিত্তীয় সকাহ:
বিকাশৰ ১২ দিনত অসম মাইক্ৰ'ফাইনেঞ্চ উদগনি আৰু সকাহ আঁচনিৰ যোগেদি ৭৮ হাজাৰৰো অধিক ঋণধাৰকে তেওঁলোকৰ ঋণযোগ্যতা আৰু বিত্তীয় স্থিৰতা পুনৰুদ্ধাৰ কৰিবলৈ ২২৩ কোটি টকাৰ সাহাৰ্য পেকেজ আগবঢ়োৱা হ'ল ।
শিক্ষাগত উৎকর্ষক সন্মান:
বিকাশৰ ১২ দিনত হাইস্কুল শিক্ষান্ত পৰীক্ষাৰ ২৬,৯৬৯ গৰাকী সফল শিক্ষাৰ্থীলৈ নগদ পুৰস্কাৰ আগবঢ়োৱা হয় । সেইদৰে নৱম শ্ৰেণীত অধ্যয়নৰত ৩,২৩,৬৪০ শিক্ষার্থীক চাইকেল প্ৰদান কৰা হয় । আনহাতে উচ্চতৰ মাধ্যমিক পৰীক্ষা উৰ্ত্তীণ শিক্ষার্থীৰ মাজত ৪৮,৬৭৩ খন স্কুটী প্ৰদান কৰা হয় । উল্লেখ্য যে মেধাৱী শিক্ষাৰ্থীক উদগনি জনোৱাৰ ব্যৱস্থা নতুন কথা নহয় । কংগ্ৰেছ চৰকাৰৰ দিনৰে পৰা এনে আঁচনি ৰাজ্যত চলি আছে ।
অৱশ্যে হিমন্ত বিশ্ব শৰ্মা চৰকাৰে নতুনকৈ নতুন ৰূপত শিক্ষাৰ্থীৰ বাবে আঁচনি আনিছে । সেয়াও হিতাধিকাৰী আঁচনি । শিক্ষাৰ্থীকো হিতাধিকাৰী কৰা হৈছে । নিযুত মইনা আঁচনিৰ যোগেদি প্ৰায় ১০ লাখ ছাত্ৰীক উচ্চশিক্ষা গ্ৰহণৰ বাবে প্ৰতি মাহে এহাজাৰ টকাৰ পৰা ২৫০০ টকালৈ বেংক একাউণ্টযোগে ডি বি টিৰ জৰিয়তে প্ৰদান কৰি অহা হৈছে । বিকাশৰ ১২ দিনীয়া কাৰ্যসূচীত ইয়াকো সামৰি লোৱা হৈছে ।
দুর্যোগ প্রভাৱিতসকললৈ সাহাৰ্য:
দুর্যোগত ক্ষতিগ্রস্ত ৬,৮৬,৪৮৭টা পৰিয়াললৈ মুঠ ৩৫৩.৩৭ কোটি টকাৰ পোনপটীয়া সাহাৰ্য প্ৰদান কৰা হয় বিকাশৰ ১২ দিনত ।
ঔদ্যোগিক বিকাশক উৎসাহিতকৰণ:
খাদ্য সংসাধন গোটসমূহক সমৰ্থন কৰিবলৈ ৬,৪৯০ গৰাকী আত্মসহায়ক গোটৰ সদস্যাক ২১.৯০ কোটি টকা বিতৰণ কৰা হয় ।
অসম চৰকাৰৰ বিয়াগোম অৰুণোদয় আঁচনি:
অৰুণোদয় আঁচনিখনক লৈ মুখ্যমন্ত্রী হিমন্ত বিশ্ব শৰ্মা চৰকাৰখন বিশেষভাৱে তৎপৰ । এই আঁচনিখনৰ যোগেদি প্ৰত্যক বছৰেই নতুন ৰূপত হিতাধিকাৰীৰ সংখ্যা বৃদ্ধিত গুৰুত্ব দি আহিছে চৰকাৰখনে । আনহাতে আঁচনিৰ অধীনত দিয়া ধনৰ পৰিমাণো ক্ৰমাৎ বৃদ্ধি কৰি অহা হৈছে । বৰ্তমান এই আঁচনিৰ অধীনত হিতাধিকাৰীয়ে মাহে ১২৫০ টকাকৈ লাভ কৰে । অসম চৰকাৰে অৰুণোদয় আঁচনিৰ জৰিয়তে প্ৰতি মাহে ৪৩ লাখৰো অধিক হিতাধিকাৰীৰ বাবে ৪০০ কোটি টকাৰো অধিক ব্যয় কৰে ।
ৰেচন কাৰ্ডৰ নামত হিতাধিকাৰী:
ৰাজ্যত সৌসিদিনালৈকে ৰেচন কাৰ্ডৰ হিতাধিকাৰী আছিল ২,৪৭,৮৭,৪৭৩ । এতিয়া ইয়াৰ সৈতে ২০ লাখ নতুনকৈ অতিৰিক্তভাৱে যোগ হৈছে । ইয়াৰ অৰ্থ হৈছে যে অসমৰ প্ৰায় ৭৫ শতাংশ লোকেই ৰেচনৰ চাউল লাভ কৰা হিতাধিকাৰীলৈ পৰিণত হৈছে ।
অনুদান প্ৰদানৰ নামত চমক সৃষ্টিৰ সভা:
লক্ষ্যণীয় বিষয় যে অনুদান নাইবা সাহাৰ্য প্ৰদান কৰাৰ বিষয়টো নতুন বিষয় নহয়, যিদৰে বানপানীত ক্ষতিগ্ৰস্ত হোৱাসকলক ক্ষতিপূৰণ দিয়াৰ ব্যৱস্থা পূৰ্বৰে পৰা আছে । তাৰ পাছত নতুনকৈ সভা অনুষ্ঠিত কৰি সাহাৰ্য বিতৰণ কৰা হৈছে । এককথাত বিৰোধীয়ে কোৱাৰ দৰে এয়া চৰকাৰখনৰ ভোটৰ স্বাৰ্থত ৰাজনৈতিক প্ৰচাৰ ।
এই সন্দৰ্ভত বিৰোধী দলপতি দেৱব্ৰত শইকীয়াই নিজৰ প্ৰতিক্ৰিয়াত কয়,"চৰকাৰী আঁচনি কাৰ্যকৰী কৰাটো চৰকাৰৰ দায়িত্ব । আঁচনি এখন ঘোষণা কৰাৰ সময়তো বিশাল সভা আৰু এই আঁচনি বিতৰণ কৰাৰ নামতো বাৰে বাৰে বিশাল সভা আয়োজনৰ প্ৰয়োজনীয় কি আছে ? এই প্ৰৱণতাৰ আঁৰত চৰকাৰৰ জনকল্যাণৰ বিপৰীতে আছে দলীয় স্বাৰ্থহে । প্ৰচলিত আঁচনিকেইখনকে লৈ এইদৰে জিলাই জিলাই জয়ঢোল বজাই বিতৰণ কৰাৰ আঁৰত হয়তো চৰকাৰখনৰ আগন্তুক পঞ্চায়ত নিৰ্বাচনৰ অংক আছে ।"
হিতাধিকাৰী আৰু ঋণৰ বোজা:
পূৰ্বৰ সকলো অভিলেখ ভংগ কৰি হিমন্ত বিশ্ব শৰ্মা চৰকাৰৰ দিনত ঋণৰ পৰিমাণে ডেৰ লাখ কোটি টকাৰ ঘৰ অতিক্ৰম কৰিলে । চলিত মাহতে দুবাৰকৈ ৯০০ কোটি টকাকৈ ঋণ ল'লে অসম চৰকাৰে । বিগত তিনি বছৰত হিমন্ত বিশ্ব শৰ্মা নেতৃত্বাধীন অসম চৰকাৰে অভিলেখ পৰিমাণৰ ৬১,১৯১ কোটি টকাৰ ঋণ লৈছে । এই ঋণৰ পৰিমাণ এতিয়া আৰু বৃদ্ধি হৈছে ।
লক্ষণীয় বিষয় যে ঋণৰ সিংহভাগেই ব্যয় হৈছে হিতাধিকাৰী আঁচনিৰ নামত । ইফালে অহা মাৰ্চ মাহলৈকে ৫ হাজাৰ কোটি টকাৰ ঋণ লোৱাৰ লক্ষ্য অসম চৰকাৰৰ । লক্ষণীয় বিষয় যে বিকাশৰ ১২ দিনৰ নামত চৰকাৰখনৰ হিতাধিকাৰীক সন্তুষ্ট কৰা যেনহে পৰিলক্ষিত হ'ল । যি সময়ত মূল্যবৃদ্ধিৰ কৱলত পৰি ৰাজ্যৰ মধ্যবিত্ত আৰু নিম্ন মধ্যবিত্তৰ অৱস্থা পানীত হাঁহ নচৰা হৈছে সেই সময়ত চৰকাৰখনে ঋণ-ধাৰ কৰি হিতাধিকাৰীক সন্তুষ্ট কৰাত ব্যস্ত হৈ আছে ।
