গুৱাহাটী, ২৩ জানুৱাৰী : নগাঁৱত আৰক্ষীৰ গুলীত আহত হোৱা ছাত্ৰ নেতা কীৰ্তিকমল বৰাক উন্নত চিকিৎসাৰ বাবে জিএমচিএইচত ভৰ্তি কৰোৱা হৈছে ৷ শনিবাৰে নিশা প্ৰায় ১২.৩০ বজাত জিএমচিএইচত ভৰ্তি কৰোৱা হয় বৰাক ৷ সম্প্ৰতি তেওঁৰ স্বাস্থ্যৰ অৱস্থা সুস্থিৰ যদিও আক্ৰান্ত হৈছে কৰ’ণাত ৷ যাৰ বাবে বৰ্তমান জিএমচিএইচৰ ক’ভিড ৱাৰ্ডত চিকিৎসাধীন হৈ আছে ৷
এই বিষয় সম্পৰ্কে জিএমচিএইচৰ অধীক্ষক ডাঃ অভিজিৎ শৰ্মাই কয় যে, শনিবাৰে নিশা ১২.৩০ বজাত কীৰ্তিকমল বৰাক (২২) ক জিএমচিএইচলৈ অনা হৈছিল ৷ তেওঁক ক’ভিড পৰীক্ষা কৰাত ভাইৰাছবিধত আক্ৰান্ত হোৱাৰ কথা পোহৰলৈ আহে (Kirti kamal Bora tested covid positive) ৷ এটা চিকিৎসকৰ দলে ক’ভিড ৱাৰ্ডত তেওঁৰ চিকিৎসা অব্যাহত ৰাখিছে ৷ সম্প্ৰতি তেওঁৰ স্বাস্থ্যৰ অৱস্থা সুস্থিৰ বুলি চিকিৎসকে সদৰী কৰে ৷ ছাত্ৰ নেতাগৰাকীয়ে মূৰ আৰু হাতত আঘাত পোৱাৰ লগতে সোঁ ভৰিৰ উৰুত আঘাতপ্ৰাপ্ত হোৱাত ভৰিৰ হাড়ডাল ভাগি যোৱা বুলি মন্তব্য কৰে চিকিৎসক শৰ্মাই ৷
উল্লেখ্য যে, অসম আৰক্ষীয়ে অব্যাহত ৰখা এনকাউন্টাৰ নীতিৰ ভয়ানক পৰিণতিৰ ফলত শনিবাৰে নিশা নগাঁৱৰ কচলুখোৱাত নিৰীহ ছাত্ৰ নেতা কীৰ্তিকমল বৰা এন্টি নাৰ্কটিক স্কোৱাডৰ আৰক্ষী বিষয়াৰ গুলীত আহত হয় ৷ শনিবাৰে সন্ধিয়া প্ৰায় ৭ বজাত তেওঁ ঔষধ আনিবৰ বাবে ফাৰ্মাচীলৈ আহিছিল । সেই সময়তে কচলুখোৱা ৰাসোৎসৱস্থলীৰ ওচৰত অসামৰিক পোচাকত থকা কেইজনমান আৰক্ষীয়ে কেইজনমান যুৱকক সোধ-পোচ কৰাৰ লগতে মাৰপিট কৰি আছিল ৷
লগতে চাওক: Student Leader Shot by Police : প্ৰতিবাদকাৰীৰ শ্ল’গানেৰে উত্তাল নগাঁৱৰ ৰাজপথ
এই দৃশ্য কীৰ্তিকমল নামৰ ছাত্ৰজনে প্ৰত্যক্ষ কৰি অসামৰিক পোছাকত থকা আৰক্ষীৰ লোককেইজনক ইয়াৰ কাৰণ সোধে । আৰক্ষীৰ লোককেইজনে এই কথাতে কীৰ্তিকমলৰ লগত তৰ্কাতৰ্কিত লিপ্ত হয় ৷ ততালিকে বনিয়া উপাধিৰ এজন আৰক্ষীৰ জোৱানে খঙত অগ্নিশৰ্মা হৈ কীৰ্তিকমলৰ ভৰিলৈ লক্ষ্য কৰি গুলী চলায় (Nagaon Police team allegedly shot a student leader at Kachalukhua in Nagaon) । আৰক্ষীৰ লোককেইজনে কীৰ্তিকমল সুৰামত্ত হৈ আছিল বুলি অভিযোগ কৰিছে ।
তাৰ পিছৰে পৰা ৰাজ্যৰ সৰ্বত্ৰে আৰম্ভ হৈছে ব্যাপক চৰ্চা, প্ৰতিক্ৰিয়া আৰু প্ৰতিবাদ ৷ ঘটনা সন্দৰ্ভত শিৱসাগৰ সমষ্টিৰ বিধায়ক অখিল গগৈৰ লগতে অসম জাতীয় পৰিষদৰ সভাপতি লুৰিণজ্যোতি গগৈয়ে প্ৰতিক্ৰিয়া প্ৰকাশ কৰিছে ৷
লগতে চাওক: Student Leader Shot by Police : আনন্দ মিশ্ৰৰ পদত্যাগ দাবী বিধায়ক অখিল গগৈৰ
