গুৱাহাটী,23 মে’: ৰাজ্যত ক’ভিডৰ ভয়াৱহ সংক্ৰমণে ৰাইজক আতংকিত কৰি তোলাৰ সময়তে প্ৰতিষেধকৰ নাটনিয়ে আন এক শংকাৰ সৃষ্টি কৰিছে । উল্লেখ্য যে, ক’ভিড অতিমাৰীৰ পৰা প্ৰাণ ৰক্ষা পোৱাৰ ক্ষেত্ৰত প্ৰতিষেধক একমাত্ৰ ৰক্ষাকৱচ হিচাপে চিহ্নিত হৈছে । কিন্তু এই ৰক্ষাকৱচৰ নাটনি হোৱাত সৰ্বসাধাৰণ ৰাইজৰ মাজত শংকাই দেখা দিছে । কিয়নো ৰাজ্যত শেহতীয়াকৈ ক’ভিডত মৃত্যু হোৱা লোকৰ হাৰ অ-স্বাভাৱিকভাৱে বৃদ্ধি পোৱাত নাগৰিকসকল শংকিত হৈ পৰিছে । সকলোৱে বিচাৰিছে প্ৰতিষেধকৰ ৰক্ষাকৱচ ।
কিন্তু স্বাস্থ্য বিভাগে পৰ্যাপ্ত প্ৰতিষেধক যোগান ধৰিব নোৱৰাৰ বাবে হাহাকাৰ কৰিবলগীয়া হৈছে নাগৰিকসকলে । প্ৰতিষেধকৰ নাটনিৰ বাবেই স্বাস্থ্য বিভাগে দৈনিক টীকাকৰণৰ হাৰ কমাই দিছে । স্বাস্থ্য মন্ত্ৰণালয়ৰ COWIN প’ৰ্টেলত প্ৰতিষেধক লোৱাৰ বাবে শ্লট বুকিং কৰিবলৈ হাহাকাৰ কৰিবলগীয়া হৈছে সৰ্বসাধাৰণ লোকে । দিনৰ পাছত দিন শ্লট বুকিং কৰাৰ বাবে চেষ্টা কৰিও সফল হ’ব পৰা নাই বহু লোক । ইপিনে স্বাস্থ্য বিভাগৰ তথ্যত স্পষ্ট হৈ পৰিছে যে, অসমত আৰু দুদিনৰ বাবেহে মজুত আছে প্ৰতিষেধক ।
উল্লেখ্য যে, পূৰ্বৰ দৰে দৈনিক এক লাখকৈ লোকক প্ৰতিষেধক দিবলৈ হ’লে 45 বছৰ ঊৰ্ধৰ লোকক সৰ্বাধিক দুদিন আৰু 18 বছৰ ঊৰ্ধৰ লোকক মাত্ৰ এদিনৰ বাবেহে দিব পৰাকৈ প্ৰতিষেধক মজুত আছে । বিভাগীয় কৰ্তৃপক্ষই প্ৰকাশ কৰা তথ্য মতে, হাস্পতালৰ হিমগৃহত 45 বছৰ ঊৰ্ধৰ ব্যক্তিৰ বাবে বৰ্তমান মজুত আছে প্ৰায় 2.5 লাখ ড’জ প্ৰতিষেধক । আনহাতে 18 বছৰ ঊৰ্ধৰ লোকৰ বাবে মজুত আছে প্ৰায় 1 লাখ ড’জ প্ৰতিষেধক ।
স্বাভাৱিকতেই কেন্দ্ৰীয় চৰকাৰে কম কমকৈ প্ৰতিষেধক অসমলৈ প্ৰেৰণ কৰাত যিকোনো মুহুৰ্ততে প্ৰতিষেধক প্ৰদান প্ৰক্ৰিয়াটো বন্ধ হৈ পৰাৰ আশংকা কৰা হৈছে । উল্লেখ্য যে, বহুকেন্দ্ৰত বিগত 6-7 দিন ধৰি বন্ধ হৈ আছিল প্ৰতিষেধকৰ যোগান । পৰিস্থিতিৰ প্ৰতি লক্ষ্য ৰাখি স্বাস্থ্য বিভাগে দৈনিক কম কমকৈ হ’লেও প্ৰতিষেধক প্ৰদান প্ৰক্ৰিয়া অব্যাহত ৰাখি ৰাইজক আশ্বস্ত কৰাৰ চেষ্টা চলাইছে । যাতে প্ৰতিষেধক নাই বুলি কোনো লোক শংকিত নহয় । যাৰ বাবে এটা সময়ত দৈনিক লাখতকৈ অধিক লোকক প্ৰতিষেধক দিয়া অসমত এতিয়া দৈনিক 35-50 হাজাৰলৈ টীকাকৰণ নামি আহিছে ৷
অসমত 16 জানুৱাৰীৰ পৰা এতিয়ালৈকে বিগত 126 দিনত মুঠ 37,13,743 গৰাকী লোকক ক'ভিড প্ৰতিষেধক দিয়া হৈছে। ইয়াৰে 29 লাখ 25 হাজাৰ 461 গৰাকীয়ে প্ৰথম পালি আৰু 7 লাখ 74 হাজাৰ 674 গৰাকীয়ে দ্বিতীয় পালি প্ৰতিষেধক লাভ কৰিছে । বিগত 24 ঘণ্টাত 49 হাজাৰ গৰাকী লোকে প্ৰতিষেধক লাভ কৰিবলৈ সক্ষম হৈছে । এইদৰে যদি প্ৰতিষেধক প্ৰদানৰ কাম চলি থাকে তেনেহ’লে ৰাজ্যৰ 3 কোটি 12 লাখ 5 হাজাৰ 576 গৰাকী ব্যক্তিক প্ৰথম পালি প্ৰতিষেধক দিবলৈ সময় লাগিব প্ৰায় 4 বছৰ আৰু দ্বিতীয় পালি প্ৰতিষেধক দিবলৈ সময় লাগিব প্ৰায় 10-12 বছৰ ।
উল্লেখ যে, অসমক অধিক গুৰুত্ব দিয়াৰ কথা কোৱা কেন্দ্ৰৰ বিজেপি চৰকাৰে অসমলৈ এতিয়ালৈকে মাত্ৰ 21 লাখ 56 হাজাৰ 178 পালি প্ৰতিষেধক প্ৰেৰণ কৰিছে আৰু অসম চৰকাৰে ক্ৰয় কৰিছে 7 লাখ 69 হাজাৰ 027 পালি । অৰ্থাৎ কেন্দ্ৰীয় চৰকাৰে 32 কোটি 34 লাখ 26 হাজাৰ 700 টকাৰ ভেকচিন প্ৰদান কৰাৰ বিপৰীতে অসম চৰকাৰে 30 কোটি 76 লাখ 10 হাজাৰ 800 টকাৰ প্ৰতিষেধক ক্ৰয় কৰিছে ।
উল্লেখ যে, ভাৰত চৰকাৰে এটা প্ৰতিষেধক ক্ৰয় কৰে 150 টকা দামত আৰু ৰাজ্য চৰকাৰে ক্ৰয় কৰিব লাগে 400 টকা দামত । মাথো ঘোষণাতে সীমিত থকা কেন্দ্ৰীয় চৰকাৰে ভেকচিনৰ বাবে ধার্য কৰা 35 হাজাৰ কোটি টকাৰে প্ৰতিজন মানুহক দুপালিকৈ প্ৰতিষেধক দিয়াৰ ব্যৱস্থা কৰিবলৈ এতিয়ালৈকে সক্ষম হোৱা নাই । ইফালে অসম চৰকাৰেও প্ৰতিষেধক প্ৰদানৰ প্ৰক্ৰিয়াটোক দ্ৰুত গতিত আগুৱাই নিবলৈ সক্ষম হোৱা নাই ।
এতিয়ালৈকে মুঠ জনসংখ্যাৰ মাত্ৰ 8.13 শতাংশই প্ৰথম পালি আৰু 2.15 শতাংশই দ্বিতীয় পালি প্ৰতিষেধক লাভ কৰিবলৈ সক্ষম হৈছে । চলিত গতিত প্ৰতিষেধক দিলে অসমৰ তিনি কোটি মানুহে প্ৰতিষেধক পাবলৈ কিমান বছৰ লাগিব সেয়া সকলোৰে অনুমেয় ।
উল্লেখ যে, মুখ্যমন্ত্ৰী হিমন্ত বিশ্ব শৰ্মা আৰু স্বাস্থ্যমন্ত্ৰী কেশৱ মহন্তই নিজেই স্বীকাৰ কৰিছে যে ৰাজ্যত প্ৰতিষেধকৰ নাটনি আছে । তেনেস্থলত সাধাৰণ ৰাইজ শংকিত হোৱাটো স্বাভাৱিক কথা ।
লগতে পঢ়ক: দেশত পূৰ্বতকৈ হ্ৰাস পাইছে কৰ'ণাত মৃ্ত্যু হোৱা লোকৰ সংখ্যা
