গুৱাহাটী, ২৭ মে': কংগ্ৰেছ বিধায়িনী দলৰ মুখ্য সচেতক ৱাজেদ আলী চৌধুৰীলৈ (CLP Chief Whip Wazed Ali Chaudhury) প্ৰদেশ কংগ্ৰেছে জাৰি কৰিছে কাৰণ দৰ্শোৱাৰ জাননী ৷ কংগ্ৰেছৰ নীতি নিৰ্দ্ধাৰণ প্ৰসংগত কৰা কেতবোৰ মন্তব্যৰ বাবেই ৱাজেদ আলী চৌধুৰীলৈ জাৰি কৰা হৈছে এই জাননী ৷ জ্যেষ্ঠ নেতা তথা বিধায়ক ৰকিবুল হুছেইনৰ (Congress MLA Rockybul Hussain) প্ৰসংগত অলপতে দলীয় নেতৃত্বৰ প্ৰতি প্ৰশ্ন উত্থাপন কৰিছিল ৱাজেদ আলী চৌধুৰীয়ে ৷
ইফালে ৱাজেদ আলী চৌধুৰীয়ে কৰা মন্তব্য সন্দৰ্ভত আজি সংবাদ মাধ্যমৰ আগত প্ৰতিক্ৰিয়া প্ৰকাশ কৰে প্ৰদেশ কংগ্ৰেছৰ সভাপতি ভূপেন বৰাই (APCC President Bhupen Bora) । তেওঁ কয় যে এটা শৃংখলাৰ মাজত দল পৰিচালিত হয় । দল কেনেকৈ পৰিচালিত হ'ব তাৰ সিদ্ধান্ত দলীয় মজিয়াতে লোৱা হৈছে ।
তেওঁ আৰু কয় যে বিধায়িনী দলৰ মজিয়াত দলৰ কেন্দ্ৰীয় সাধাৰণ সম্পাদকৰ উপস্থিতিত বিৰোধী দলপতিৰ সভাপতিত্বত সিদ্ধান্ত লোৱা হৈছিল যে আমাৰ দলৰ কোনো আভ্যন্তৰীণ বিষয় কোনেও সংবাদ মাধ্যমৰ আগত আলোচনা নকৰে । আনকি ময়ো আলোচনা নকৰো ।
সেইবাবে মই আপোনালোকৰ সকলো প্ৰশ্নৰ মুকলিকৈ উত্তৰ দিব নোৱাৰিম বুলি তেওঁ কয় । কোনোবাই দলীয় শৃংখলা ভংগ কৰিলে তেওঁৰ বিৰুদ্ধে ব্যৱস্থা গ্ৰহণ কৰা হ'ব বুলি সদৰি কৰি তেওঁ কয় যে সেয়া লগিলে ভূপেন বৰাই হওক নাইবা আন কোনোৱা ডাঙৰ পদবীত থকা নেতাই হওক । দলীয় সংবিধান মতে দলে ব্যৱস্থা ল'ব ।
কাৰো ক্ষেত্ৰতে এৰাধৰা নহ'ব । ৱাজেদ আলী চৌধুৰীৰ প্ৰসংগত তেওঁ কয় যে দলীয় শৃংখলা ভংগ কৰিলে তথা দলৰ আভ্যন্তৰীণ বিষয় যদি বাহিৰত কয় তেন্তে দলে ব্যৱস্থা গ্ৰহণ কৰিব । কেৱল দলৰ সভাপতি, বিৰোধী দলপতি আৰু দায়িত্বত থকা এ আই চি চিৰ সাধাৰণ সম্পাদক এই তিনিজনক কথা কোৱাৰ অধিকাৰ দিয়া হৈছে ।
এই তিনিজনক বাদ দি কোনোৱেই 'পলিচি মেটাৰ'ত কথা ক'ব নোৱাৰিব বুলি তেওঁ কয় । এইটো বাৰম্বাৰ দলীয় কৰ্মীক কৈ থকা হৈছে বুলি উল্লেখ কৰি তেওঁ কয় যে যিটো কাৰণত আমাৰ দলৰ এজন নেতাক নিলম্বন কৰিব লগা হৈছে । বাকী কোনোৱাই এনে ভুল কৰিলে একেই দশা হ'ব বুলিও তেওঁ স্পষ্ট কৰি দিয়ে ৷
লগতে পঢ়ক: চীনৰ পৰা 50 হাজাৰ PPE কীট কিনা নাছিল চৰকাৰে: কংগ্ৰেছ
