গুৱাহাটী, 20 ডিচেম্বৰ : উজনি অসমৰ বিজেপিৰ এগৰাকী জ্যেষ্ঠ নেতাই বুধবাৰে কংগ্ৰেছ দলত যোগদান কৰে ৷ নেতাগৰাকী হৈছে উদয় শংকৰ হাজৰিকা ৷ বিজেপিৰ হৈ লখিমপুৰ লোকসভা সমষ্টিৰ পৰা তিনিবাৰকৈ প্ৰতিদ্বন্দ্বিতা আগবঢ়োৱা উদয় শংকৰ হাজৰিকাই সুদীৰ্ঘ সময় বিজেপিৰ নিষ্ঠাবান কৰ্মী হিচাপে সেৱা আগবঢ়াই আহিছিল ৷
আনহাতে এসময়ত তেওঁ সক্ৰিয়ভাৱে সদৌ অসম ছাত্ৰ সন্থাৰে জৰিত আছিল ৷ আজি তেওঁ গেৰুৱা সাজ ত্যাগ কৰি কংগ্ৰেছৰ ছত্ৰছায়ালৈ আহে ৷ গুৱাহাটীৰ ৰাজীৱ ভৱনত আয়োজন কৰা এক অনুষ্ঠানত আজি নিখিল ভাৰত কংগ্ৰেছ কমিটীৰ সাধাৰণ সম্পাদক তথা প্ৰদেশ কংগ্ৰেছৰ তত্বাৱধায়ক জীতেন্দ্ৰ সিঙৰ উপস্থিতিত তেওঁ কংগ্ৰেছ দলত আনুষ্ঠানিকভাৱে যোগদান কৰে ৷
অনুষ্ঠানত প্ৰদেশ কংগ্ৰেছৰ সভাপতি ভূপেন বৰা, বিৰোধী দলপতি দেৱব্ৰত শইকীয়া, উপ-দলপতি ৰকিবুল হুছেইন, নিখিল ভাৰত কংগ্ৰেছ কমিটীৰ সম্পাদক তথা অসম প্ৰদেশ কংগ্ৰেছৰ সহ-তত্বাৱধায়ক পৃথ্বীৰাজ সাথে, নিখিল ভাৰত কংগ্ৰেছ কমিটীৰ সম্পাদক তথা অসম প্ৰদেশ কংগ্ৰেছৰ সহ-তত্বাৱধায়ক সম্পাদক বিকাশ উপাধ্যায়, প্ৰদেশ কংগ্ৰেছৰ কাৰ্যকৰী সভাপতি ক্ৰমে ৰাণা গোস্বামী, কমলাক্ষ দে' পুৰকায়স্থ আৰু জাকিৰ হুছেইন শিকদাৰকে ধৰি ভালেসংখ্যক নেতা উপস্থিত আছিল ৷
উদয় শংকৰ হাজৰিকাক দলত আদৰণি জনায় জীতেন্দ্ৰ সিঙে কয় যে কংগ্ৰেছ দল এক পৰিয়ালৰ দৰে ৷ ইয়াত কাম কৰাৰ আৰু কথা কোৱাৰ সকলোৰে স্বাধীনতা আছে ৷ বিজেপি চৰকাৰক কঠোৰ ভাষাৰে সমালোচনা কৰি তেওঁ কয় যে বিজেপি চৰকাৰে বিভাজনৰ ৰাজনীতি কৰি আহিছে ৷ অনুষ্ঠানত প্ৰদেশ কংগ্ৰেছৰ সভাপতি ভূপেন বৰাই উদয় শংকৰ হাজৰিকাক আদৰণি জনাই বক্তব্য আগবঢ়ায় ৷ আনহাতে অনুষ্ঠানত কংগ্ৰেছত যোগদান কৰা উদয় শংকৰ হাজৰিকাই নিজৰ মনৰ ভাৱ ব্যক্ত কৰে ৷
লগতে পঢ়ক : কাক কাক প্ৰাৰ্থী হিচাপে বিচাৰে সভাপতি ভূপেন বৰাই ?
