গুৱাহাটী,21আগষ্টঃ অসম প্ৰদেশ কংগ্ৰেছ কমিটিৰ সভাপতি ৰিপুণ বৰাই ৰাজীৱ ভৱনত এক সংবাদমেল অনুষ্ঠিত কৰি দেশৰ অৰ্থনৈতিক অৱস্থাৰ ছবি দাঙি ধৰি মোদী চৰকাৰক তীব্ৰ আক্ৰমণ কৰে । ৰিপুণ বৰাই সংবাদমেলত দেশৰ অৰ্থনৈতিক অৱস্থাৰ তথ্য দাঙি প্ৰতিক্ৰিয়া প্ৰকাশ কৰে যে বিমুদ্ৰাকাৰণ প্ৰদানমন্ত্ৰী মোদীৰ এক ভুল সিদ্ধান্ত আছিল । বিমুদ্ৰাকৰণৰ বাবে দেশত নিবনুৱা সমস্যা দিনক দিনে বৃদ্ধি পাইছে বুলি উল্লেখ কৰে জ্যেষ্ঠ কংগ্ৰেছ নেতা গৰাকীয়ে ।
তেওঁ লগতে কয় যে বিমুদ্ৰাকৰণৰ পিছত দেশত ৬ শতাংশ হাৰত নিবনুৱা সমস্যা বৃদ্ধি পাইছে, যিটো বিগত ৪৫ বছৰত সৰ্ববৃহৎ । ইপিনে অনাগত ২ মাহত দেশত ১০ লাখ লোকে চাকৰি হেৰুৱাব, বৰ্তমান ৩ লাখ লোকে চাকৰি হেৰুৱাইছে আৰু ৭ লাখ লোক দুমাহৰ ভিতৰত চাকৰি হেৰুৱাব বুলি প্ৰকাশ কৰে ৰিপুণ বৰাই ।
আনহাতে কৃষিকাৰ্যত ব্যৱহাৰ হোৱা ট্ৰেক্টৰৰ বিক্ৰী ১৪ শতাংশ হ্ৰাস পোৱাটো দেশৰ কৃষিখণ্ডৰ বাবে এক বেয়া ইংগিত বুলিও উল্লেখ কৰে ৰিপুণ বৰাই । লগতে জানিবলৈ দিয়ে যে দেশত নতুন প্ৰকল্পত বিনিয়োগ প্ৰায় ৭৯ শতাংশলৈ কমিছে । চৰকাৰে কোনো ধৰণৰ নতুন প্ৰকল্প আৰম্ভ কৰা নাই আৰু অৰ্থৰ অভাৱত চৰকাৰে আৰম্ভ কৰা প্ৰকল্প সমূহৰ ৩০ শতাংশ প্ৰকল্পৰ কাম বন্ধ হৈ আছে বুলি জানিবলৈ দিয়ে ৰিপুণ বৰাই ।
