গুৱাহাটী, 1 অক্টোবৰ : দিছপুৰ বিধানসভা সমষ্টি(Dishpur Constituency)ৰ অন্তৰ্গত পানীখাইটি অঞ্চলত 45 জন সন্দেহজনক নাগৰিকে ভূমি বেদখল(Encroachment) কৰা বুলি সংবাদ মাধ্যমৰ আগত খোদ শাসকীয় দলৰ দিছপুৰৰ বিধায়ক অতুল বৰা(Atul Bora)ই অভিযোগ তুলিছিল ৷ ইয়াৰ পাচতে বেদখলকৃত চৰকাৰী ভূমি উচ্ছেদৰ বাবে তৎপৰ হৈ পৰিছে আৰক্ষী-প্ৰশাসন ।
দিছপুৰীয়া বিধায়কগৰাকীৰ এনে সিদ্ধান্তৰ পাচতে মহানগৰীৰ পাৰ্শ্বৱৰ্তী অঞ্চল পানীখাইটিৰ জোনাকী নগৰত বেদখলকাৰীৰ সন্ধানত অভিযান চলাইছে আৰক্ষীয়ে । মধ্য গুৱাহাটী আৰক্ষীৰ সহকাৰী আৰক্ষী আয়ুক্ত নীলোৎপল ডেকাৰ নেতৃত্বত প্ৰাগজ্যোতিষপুৰ আৰু পানীখাইটি আৰক্ষী(Panikhaiti Police)ৰ এটা দলে পানীখাইটি অভয়াৰণ্য(Panikhaiti Wildlife Sanctuary)ৰ দাঁতিকাষৰীয়া জোনাকী নগৰ নামৰ গাঁওখনত এই অভিযান চলাইছে ৷
অৱশ্যে, অভিযান কালত আৰক্ষীৰ দলটোৱে অঞ্চলটোত কোনো লোকে নতুনকৈ প্ৰৱেশ কৰা অথবা বসতি কৰাৰ তথ্য লাভ নকৰাৰ কথা ব্যক্ত কৰে । সম্প্ৰতি যি কেইটা পৰিয়াল আছে, সেইকেইটা দুই-তিনি বছৰ পূৰ্বে অহা বুলি সন্দেহ কৰিছে আৰক্ষীয়ে ।
ইফালে, স্থানীয় ৰাইজ তথা দল-সংগঠনে অভিযোগ তুলি কয় যে, আমচাং অভয়াৰণ্য(Amchang Wildlife Sanctuary)ৰ অন্তৰ্গত এই অঞ্চলটোত বিগত তিনি-চাৰি বছৰ ধৰি একাংশ সন্দেহযুক্ত নাগৰিকে স্থানীয় একাংশ লোকৰ ছত্ৰছায়াত জোনাকী নগৰ নামেৰে এখন বৃহৎ গাঁও গঢ়ি তুলিছে । উক্ত গাঁওখনত প্ৰতিদিনে নিশাটোৰ ভিতৰতে বহু নতুন মুখৰ লোকে থিতাপি লৈ থকা বুলি জানিব পৰা গৈছে ।
সেয়েহে, জোনাকী নগৰত উচ্ছেদ অভিযান চলাই আমচাং অভয়াৰণ্যৰ ভূমিৰ লগতে চৰকাৰী ভূমি বেদখলমুক্ত কৰিবৰ বাবে চৰকাৰক আহ্বান জনাইছে সচেতন ৰাইজ আৰু স্থানীয় দল-সংগঠনসমূহে । উল্লেখ্য যে, পানীখাইতি শাখা ছাত্ৰ সন্থা(Panikhaiti AASU)ই জোনাকী নগৰত উচ্ছেদ চলোৱাৰ বাবে আহ্বান জনাই ইতিমধ্যে কামৰূপ মহানগৰ জিলা উপায়ুক্ত(Kamrup DC)লৈ এখন স্মাৰক পত্ৰ প্ৰেৰণ কৰিছে ।
লগতে পঢ়ক : ৰাইজৰ নিঃস্বাৰ্থ সেৱাত নিয়োজিত আৰক্ষীলৈ ‘অসম আৰক্ষী দিৱস’ৰ শুভেচ্ছা
