গুৱাহাটী,27জুনঃ গুৱাহাটী মহানগৰীৰ পাণ্ডুত বাসগৃহৰ ওপৰত পাহাৰীয়া পথ খহি পৰাৰ ফলত ভয়ংকৰ ভূমিস্খলনৰ ঘটনা সংঘটিত হয় । ইপিনে কথমপি প্ৰাণৰক্ষা পৰে এগৰাকী বৃদ্ধাৰ লগতে পৰিয়ালটোৰ ৷ গেমন ইণ্ডিয়াই অঞ্চলটোত পানীৰ পাইপ বহুৱাৰ নামত পথসমূহ খান্দি অতি বিপদজনক ভাৱে এৰি থৈ গৈছিল । ফলত যোৱা কেইবাদিন ধৰি হৈ থকা নেৰানেপেৰা বৰষুণৰ ফলত খহি পৰে গাৰ্ড ৱাল । ফলত গেমনৰ দায়িত্বজ্ঞানহীনতাৰ ফল ভুগিবলগীয়া হৈছে এতিয়া অঞ্চলটোৰ ৰাইজে ৷
ইফালে অঞ্চলটোৰ পাণ্ডু নাথস্থিত অনুকুল ঠাকুৰ মন্দিৰৰ প্ৰকাণ্ড অট্টালিকা আৰু গাৰ্ড ৱালো যিকোনো মূহুৰ্ততে খহি যাব পাৰে । ফলত মন্দিৰৰ তলৰ চৌহদত থকা প্ৰায় ১৫ ঘৰ লোকে এতিয়া শংকাত বিনিদ্ৰ ৰজনী কটাবলগীয়া হৈছে । অঞ্চলটোৰ ৰাইজে প্ৰাণ ৰক্ষা কৰিবলৈ জিলা প্ৰশাসনক কাতৰ অনুৰোধ জনাইছে । উল্লেখযোগ্য যে, বৰ্তমান অতি ভয়ংকৰ স্থান ৰূপে চিহ্নিত হৈছে উক্ত পাহাৰীয়া অঞ্চলটো ৷
লগতে পঢ়কঃ বাঢ়নীপানী চাবলৈ গৈ সন্ধানহীন কিশোৰ
