গুৱাহাটী, ৯ মাৰ্চ: ৰাজ্যজুৰি ৰঙৰ উৎসৱ ফাকুৱা উলহ-মালহেৰে উদযাপন কৰা হয় । মঙলবাৰ আৰু বুধবাৰ এই দুদিন ৰাজ্যবাসী ৰঙৰ উৎসৱত মতলীয়া হৈ পৰাৰ সময়তে ৰাজ্যত বিক্ৰী হ'ল অভিলেখ পৰিমাণৰ সুৰা । একাংশই ৰঙীণ পানীয়ৰ সৈতে ৰঙৰ উৎসৱটো উপভোগ কৰে । ফাকুৱাৰ দুদিনত ৰাজ্যত ১০.৬২ কোটি টকাৰ সুৰা বিক্ৰী হয় । ইয়াৰে মঙলবাৰে ৯.৫৮ কোটি টকাৰ আৰু বুধবাৰে ১.৪ কোটি টকাৰ সুৰা বিক্ৰী হৈছে (Record Sale Of Liquor In Assam during Daul)। অৱশ্যে এই পৰিমাণ আৰু বৃদ্ধি পোৱাৰ সম্ভাৱনা আছে । ইফালে, ৰাজধানী চহৰ গুৱাহাটী মহানগৰীতে দুদিনত বিক্ৰী হয় ৫.১৮ কোটি টকাৰ সুৰা ।
উল্লেখ্য় যে, উৎসৱ-পাৰ্বন আদিৰ সময়ত ৰাজ্যখনত সুৰাৰ বিক্ৰীয়ে অভিলেখ সৃষ্টি কৰাটো নতুন কথা নহয় (Sales of record quantity of alcohol in Assam)। বিশেষকৈ গুৱাহাটী মহানগৰী একপ্ৰকাৰে সুৰাৰ বন্যাত উটি-ভাহি যায় । দীপাৱলীৰ সময়টো দুটা দিনত গুৱাহাটী মহানগৰীত বিক্ৰী হৈছিল প্ৰায় ছয় কোটি টকাৰ সুৰা । সেইদৰে দুৰ্গা পূজাৰ সময়ত গুৱাহাটী মহানগৰত সুৰা বিক্ৰীয়ে গঢ়িছিল অভিলেখ । দুৰ্গা পূজাত কেৱল গুৱাহাটীত ১৬.৮০ কোটি টকাৰ সুৰা বিক্ৰী হৈছিল । অনুৰূপ ধৰণে বিশ্বকৰ্মা পূজাতো গুৱাহাটীত বিক্ৰী হৈছিল মুঠ ৬.২০ কোটি টকাৰ সুৰা ।
লক্ষ্যনীয় বিষয় যে, প্ৰত্যেক বছৰেই সুৰাৰ বিক্ৰী তুলনামূলকভাৱে বৃদ্ধি পাই আহিছে । নৱবৰ্ষ, দুৰ্গা পূজা, বিহু, ফাকুৱা আদি বিভিন্ন উৎসৱ-পাৰ্বনত নতুন নতুন অভিলেখ গঢ়ি সুৰা বিক্ৰী ক্ৰমাৎ বৃদ্ধি পাবলৈ ধৰিছে । সুৰাৰ এই ব্যাপক চাহিদা বৃদ্ধি ভাল নে বেয়া সেয়া ৰাইজে বিবেচনা কৰিব । ইফালে, ৰাজহ সংগ্ৰহৰ লক্ষ্যৰে ৰাজ্য চৰকাৰে ৰাজ্যজুৰি নতুনকৈ শ শ সুৰা বিপনীৰ অনুজ্ঞা-পত্ৰ দিয়াৰ পৰিকল্পনা কৰিছে (Assam govt liquor policy) ।
ৰাজ্য়ত বিভিন্ন দল-সংগঠনৰ প্ৰৱল বিৰোধিতা সত্বেও চৰকাৰে কেইবাখনো জিলাত শ শ সুৰা বিপনীৰ অনুজ্ঞা-পত্ৰ দিয়াৰ পৰিকল্পনা কৰিছে । ইয়াৰ দ্বাৰা বছৰি আবকাৰী ৰাজহৰ পৰিমাণ তিনি হাজাৰ কোটি টকালৈ বৃদ্ধি কৰাৰ লক্ষ্য নিৰ্ধাৰণ কৰা হৈছে । নতুনকৈ সুৰাৰ বিপণী খোলাৰ বাবে চৰকাৰে লোৱা সিদ্ধান্তকলৈ ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছে । সমাজত নেতিবাচক প্ৰভাৱ পৰিব বুলি ইয়াৰ বিৰোধিতা কৰিছে বিভিন্ন দল-সংগঠনে ।
