শ্ৰেষ্ঠ পূজাৰ খিতাপ মালিগাঁও কামাখ্যা কলনিলৈ

সম্পূৰ্ণ প্লাষ্টিক মুক্ত পূজা আয়োজন কৰি শ্ৰেষ্ঠ পূজাৰ খিতাপ লাভ কৰে কামাখ্যা কলনি পূজা কমিটিয়ে ৷ আনহাতে শ্ৰেষ্ঠ প্ৰতিমাৰ বঁটা লাভ কৰে মালিগাঁও ৰেষ্টকেম্প কালীবাৰী পূজা কমিটিয়ে

গুৱাহাটী, 6 অক্টোবৰ : ৰাজ্যৰ প্ৰান্তে প্ৰান্তে এতিয়া শাৰদীয় দুৰ্গোৎসৱৰ উৎসাহ । জাকজমকতাৰে পূজা আয়োজন কৰি ৰাইজক আকৰ্ষিত কৰাৰ চেষ্টা প্ৰতিখন পূজা কমিটিৰ । দ্য টাইমছ অফ ইণ্ডিয়া আৰু টপচেম চিমেণ্টে যৌথভাৱে প্ৰতিবছৰে মহানগৰীৰ শ্ৰেষ্ঠ পূজা সমূহক কেইবাটাও শিতানত বঁটা প্ৰদান কৰে । দেওবাৰে মহা অষ্টমীৰ দিনা ঘোষণা কৰা হয় শ্ৰেষ্ঠ পূজা, শ্ৰেষ্ঠ প্ৰতিমাকে ধৰি কেইবাটাও শিতানত বঁটা । এইবাৰৰ শ্ৰেষ্ঠ পূজাৰ খিতাপ লাভ কৰে কামাখ্যা কলনীৰ পূজা কমিটিয়ে । সম্পূৰ্ণ প্লাষ্টিক মুক্ত পূজা আয়োজন কৰি লাভ কৰিলে এই বঁটা কামাখ্যা কলনি পূজা কমিটিয়ে । প্ৰথম পুৰস্কাৰ হিচাপে পূজা কমিটিলৈ আগবঢ়োৱা হয় ৫১ হাজাৰ টকা আৰু লগতে এখনি মানপত্ৰ । ইফালে শ্ৰেষ্ঠ প্ৰতিমাৰ বঁটা লাভ কৰে মালিগাঁও ৰেষ্টকেম্প কালীবাৰী পূজা কমিটিয়ে । ইয়াৰ উপৰি মহানগৰীৰ আৰু কেইবাখনো পূজা মণ্ডপক প্ৰদান কৰা হয় বিভিন্ন বঁটা ।