গুৱাহাটী, 6 আগষ্ট : ৰাজ্যৰ বিভিন্ন প্ৰান্তত অবৈধ চুলাইৰ ঘাটিসমূহৰ বিৰুদ্ধে অব্যাহত আছে আবকাৰী বিভাগৰ অভিযান ৷ বৃহস্পতিবাৰে মহানগৰীৰ মালিগাঁও আদিংগিৰিত আবকাৰী বিভাগে চলায় অভিযান । অবাধ হাৰত বৃদ্ধি পোৱা চুলাইৰ ঘাটিৰ বিৰুদ্ধে বিভাগটোৰ এটা দলে চলায় এই অভিযান । আবকাৰী বিভাগে এই অভিযানকালত ৪০০০ কেজি চুলাই প্ৰস্তুত কৰা সামগ্ৰী বিনষ্ট কৰাৰ লগতে ৮ টাকৈ চুলাই ভাটি উৎখাত কৰে । তাৰোপৰি প্ৰায় ২০০ লিটাৰ চুলাই নষ্ট কৰে অভিযানকাৰী দলটোৱে ।
ইফালে আবকাৰী বিভাগৰ এই অভিযানৰ উমান পাই ঘটনাস্থলীৰ পৰা পলায়ন কৰে চুলাই ব্যৱসায়ীয়ে । আবকাৰী বিভাগৰ অধীক্ষক দেৱজিৎ নাথ,উপ অধীক্ষক অনন্ত কলিতা আৰু আবকাৰী বিষয়া নজৰুল ইছলামৰ নেতৃত্বত চলিছিল এই অভিযান । আইন অমান্যকাৰীৰ বিৰুদ্ধে এনেদৰেই কঠোৰ ব্যৱস্থা গ্ৰহণ কৰিব বুলি জানিবলৈ দিলে অভিযানকাৰী দলটোৱে ।
লগতে পঢ়ক : বিকাশ ডুবে ঘটনাৰ প্ৰতিবেদন দাখিলৰ সময়সীমা অতিৰিক্ত চাৰি সপ্তাহলৈ বৃদ্ধি
