নিউজ ডেস্ক , ১৬ মাৰ্চ :অসম সন্তান ভাৰতীয় সেনাৰ মেজৰ জেনেৰেল ৰাণা প্ৰতাপ কলিতাই ভাৰতীয় সেনাৰ মেজৰ জেনেৰেলৰ পৰা লেফটেনেন্ট জেনেৰেল পদলৈ পদোন্নতি লাভ কৰিছে ।
নৱনিযুক্ত লেফটেনেন্ট জেনেৰেল জনক ১৯৮৪ চনত ৯ কুমাও ৰেজিমেণ্টত নিযুক্তি দিয়া হৈছিল । তেওঁ শ্ৰীনগৰত ১৫ কৰ্পচৰ ব্ৰিগেডিয়াৰ পদবীত ১৯ ইনফেন্ত্ৰি ডিভিজনৰ নেতৃত্ব দিছিল । ইয়াৰ উপৰিও ১৩ আৰ আৰ বেটেলিয়ন আৰু লক্ষ্নৌত ৭১ ইনফেন্ত্ৰি ব্ৰিগেডৰ নেতৃত্ব দিছিল । তেওঁ সেনাৰ মুখ্য কাৰ্য্যালয়ত বিভিন্ন বিভাগীয় আৰু পৰামৰ্শদাতা পদবীতো কাৰ্যনিৰ্বাহ কৰিছিল । সামৰিক বাহিনীলৈ আগবঢ়োৱা উৎকৃষ্ট সেৱাৰ বাবে কলিতাই ইতিপূৰ্বে সেৱা মেডেল , অতি বিশিষ্ট সেৱা মেডেল আৰু সেৱা অতি বিশিষ্ট মেডেলেৰেও সন্মানিত হয় । উল্লেখ্য যে, সন্মানিত সেনা বিষয়াজনৰ ঘৰ কামৰূপ জিলাৰ ৰঙিয়াত । গোৱালপাৰাৰ সৈনিক স্কুলৰ প্ৰাক্তন ছাত্ৰ কলিতা ৰাষ্ট্ৰীয় প্ৰতিৰক্ষা একাডেমী আৰু ডেৰাডুনৰ ইণ্ডিয়ান মিলিটেৰি একাডেমীৰো প্ৰাক্তন ছাত্ৰ ।
