নিউজ ডেস্ক, 18 ফেব্ৰুৱাৰী : অসমীয়া চলচ্চিত্ৰ জগতৰ খ্যাতনামা অভিনেতা তথা মহানায়ক প্ৰয়াত বিজু ফুকনৰ আজি জন্ম জয়ন্তী (Legendary Assamese film actor Biju Phukans birthday ) ৷ জনপ্ৰিয় অসমীয়া চলচ্চিত্ৰ ডাঃ বেজবৰুৱাত (Assamese movie Dr. bezbaruah) এটা তেনেই সৰু চৰিত্ৰত অভিনয় কৰি পাছলৈ তেওঁ নিজকে অসমীয়া চলচিত্ৰ জগতৰ এজন বলিষ্ঠ অভিনেতা হিচাপে প্ৰতিষ্ঠা কৰিবলৈ সক্ষম হয় ৷
তেখেতে অভিনয় কৰা আজলী নবৌ, বোৱাৰী আদি সৰ্বকালৰ সফল অসমীয়া চলচ্চিত্ৰ বুলি গণ্য কৰা হয় । বিজু ফুকনক এগৰাকী চলচিত্ৰ পৰিচালক হিচাপেও জনা যায় ৷ এইজনা বিজু ফুকনৰ জন্ম ১৯৪৭ চনত ডিব্ৰুগড় জিলাত হয় । তেখেতৰ পিতৃ অতুল চন্দ্ৰ ফুকন এগৰাকী সামৰিক বিষয়া আছিল ৷ ডিব্ৰুগড় হনুমানবক্স সুৰজমল কানৈ মহাবিদ্যালয়ত বিজু ফুকনে পঢ়া-শুনা কৰিছিল ।
তেওঁৰ প্ৰকৃত নাম আছিল বিজয় ফুকন । চলচিত্ৰ জগতলৈ অহাৰ পাছত তেওঁ ঘৰত মতা নাম 'বিজু'ৰে নিজৰ চিনাকি দি জনপ্ৰিয় হৈ পৰে । ব্ৰজেন বৰুৱাৰ দ্বাৰা নিৰ্মিত ব্যৱসায়িকভাৱে সফল চলচিত্ৰ ডাঃ বেজবৰুৱাত এটা গানৰ দৃশ্যত অভিনয় কৰাৰ পাছত বিজু ফুকনে একে বছৰতে নিপ বৰুৱাৰ দ্বাৰা নিৰ্মিত চলচিত্ৰ 'বৰুৱাৰ সংসাৰ'ত নায়কৰ চৰিত্ৰ ৰূপায়ণ কৰে । ইয়াৰ পাছতে, একেধাৰে কেবাখনো সফল অসমীয়া চলচ্চিত্ৰত অভিনয় কৰি তাৰকা অভিনেতা হিচাপে প্ৰতিষ্ঠিত হয় বিজু ফুকন।
70 আৰু 80ৰ দশকত তেওঁ প্ৰায় 40খন চলচিত্ৰত নায়কৰ চৰিত্ৰত অভিনয় কৰিছিল । বিজু ফুকনে ভবেন্দ্ৰনাথ শইকীয়া, জাহ্নু বৰুৱাৰ চলচ্চিত্ৰত অভিনয় কৰাৰ উপৰিও ভ্ৰাম্যমাণ থিয়েটাৰটো (Mobile theatre in Assam) দূৰ্দান্ত অভিনয়ৰ দ্বাৰা দৰ্শকৰ হৃদয় জিনিবলৈ সক্ষম হৈছিল । অসমীয়া চলচিত্ৰৰ লগতে বিজু ফুকনে বাংলা ভাষাৰ চলচিত্ৰ হোটেল শ্বোফক্স, অপৰাজিত, দস্যু ৰত্নাকৰ, গজমুক্তাৰ লগতে দূৰদৰ্শনৰ বিভিন্ন ধাৰাবাহিক আৰু টেলিফিল্মত অভিনয় কৰে ।
80ৰ দশকত তেওঁ ছবি পৰিচালনাত হাত দিয়ে, তেওঁৰ দ্বাৰা পৰিচালিত ছবি 'ভাই-ভাই' ব্যৱসায়িকভাৱে যথেষ্ট সফল হয় ৷ কেৱল অভিনয়েই নহয় ৰাজনীতিতো ভৰি থৈছিল বিজু ফুকনে । তেওঁ 1999 চনৰ লোকসভা নিৰ্বাচনত অসম গণ পৰিষদ দলৰ হৈ ডিব্ৰুগড় লোকসভা সমষ্টিৰ পৰা প্ৰতিদ্বন্দ্বিতা কৰিছিল । কিন্তু এই নিৰ্বাচনত পৰাজিত হৈছিল অসমীয়া ছবিজগতৰ মহানায়কজন । 2017 চনৰ 22 নৱেম্বৰত এইগৰাকী মহান শিল্পীয়ে গুৱাহাটীৰ এপল' হাস্পতালত 70 বছৰ বয়সত শেষ নিশ্বাস ত্যাগ কৰে ।
লগতে পঢ়ক : FIR Against Political Leader: ৰাজ্যৰ ৰাজনীতিত এজাহাৰ দাখিলৰ অঘোষিত প্ৰতিযোগিতা
