গুৱাহাটী, ২৩ জুলাই : অসম জাতীয় পৰিষদৰ (AJP) সাধাৰণ সম্পাদক জগদীশ ভূঞা (Jagadish Bhuyan) অসুস্থ । মগজুৰ ৰক্তক্ষৰণত আক্ৰান্ত হোৱা ৰাজনীতিক গৰাকী বৰ্তমান চিকিৎসাধীন হৈ আছে । বৃহস্পতিবাৰে শাৰীৰিক অসুস্থতাত ভোগা জগদীস ভূঞাক গুৱাহাটীৰ জি এন আৰ চি (GNRC) হাস্পতালত ভৰ্তি কৰোৱা হয় । মগজুৰ ৰক্তক্ষৰণ হোৱা জগদীশ ভূঞাৰ বৰ্তমান স্বাস্থ্য যথেষ্ট উন্নত বুলি চিকিৎসকে জানিবলৈ দিছে ।
অৱশ্যে তেওঁক সম্প্ৰতি চিকিৎসকৰ নিৰীক্ষণত ৰখা হৈছে। অসম আন্দোলনৰ অগ্ৰণী নেতা জগদীশ ভূঞা অগপ (AGP) চৰকাৰৰ দিনত পৰ্যটন মন্ত্রী হিচাপে কাৰ্যনিৰ্বাহ কৰিছিল । পৰৱৰ্তী সময়ত তেওঁ বিজেপিত যোগদান কৰিছিল । দুবাৰকৈ বিধায়ক হোৱা জগদীশ ভূঞাই নাগৰিকত্ব সংশোধনী আইনৰ (CAA) বিৰোধীতাৰে বিজেপি দল ত্যাগ কৰিছিল ।
বিধানসভা নিৰ্বাচনৰ পূৰ্বে গঠন হৈছিল আঞ্চলিকতাবাদী দল অসম জাতীয় পৰিষদ (AJP)। এই দলটোত তেওঁক সাধাৰণ সম্পাদক দায়িত্ব প্ৰদান কৰা হয় । বিধানসভা নিৰ্বাচনত তেওঁ শদিয়াৰ পৰা অৱতীৰ্ণ হৈছিল যদিও পৰাজয় বৰণ কৰিবলগীয়া হয়।
লগতে পঢ়কঃ জোনাই ৰাজহ চক্ৰ কাৰ্যালয়ত ব্যাপক অনিময় সংঘটিত হোৱাৰ অভিযোগ
