গুৱাহাটী, 29 নৱেম্বৰঃ গুৱাহাটী বিশ্ববিদ্যালয়ৰ দায়িত্বজ্ঞানহীন কাণ্ডৰ ফল ভুগিছে শিক্ষাৰ্থীয়ে। প্ৰশ্নকাকত বিসংগতিৰ বাবে শুকুৰবাৰে বাতিল কৰিবলগীয়া হ'ল স্নাতকৰ তৃতীয় ষান্মাসিকৰ ৰাজনীতি বিজ্ঞান বিভাগৰ পৰীক্ষা। এই ঘটনাৰ পাচতে তীব্ৰ প্ৰতিক্ৰিয়াৰ সৃষ্টি হৈছিল চৌদিশে । উক্ত ঘটনা সন্দৰ্ভত মুখ খুলিছে গুৱাহাটী বিশ্ববিদ্যালয় কৰ্তৃপক্ষই । ঘটনাৰ এক তদন্ত ঘোষণা কৰিছে বিশ্ববিদ্যালয় কৰ্তৃপক্ষই।
যিসকলৰ ভুলৰ বাবে এনে অনাকাংক্ষিত পৰিস্থিতিৰ সৃষ্টি হৈছে তেওঁলোকক কঠোৰ শাস্তি দিয়া হ'ব বুলি সংবাদ মাধ্যমৰ আগত প্ৰকাশ কৰে গুৱাহাটী বিশ্ববিদ্যালয়ৰ পৰীক্ষা নিয়ন্ত্ৰক ড৹ ধ্ৰুৱজ্যোতি চৌধুৰীয়ে। ভৱিষ্যতে এনে ভুল নহয় বুলিও কয় পৰীক্ষা নিয়ন্ত্ৰকগৰাকীয়ে।
ইফালে শুকুৰবাৰে বাতিল হোৱা পৰীক্ষা আগন্তুক ১০ ডিচেম্বৰত পুৱা ৯ বজাৰ পৰা অনুষ্ঠিত হোৱাৰ জাননী ইতিমধ্যেই জাৰি কৰিছে বিশ্ববিদ্যালয় কৰ্তৃপক্ষই। আনহাতে, ছাত্ৰ-ছাত্ৰীসকলৰ জীৱনক লৈ এনেদৰে হেতালি নেখেলিবলৈ বিশ্ববিদ্যালয় কৰ্তৃপক্ষক সকিয়াই দিয়ে গুৱাহাটী বিশ্ববিদ্যালয়ৰ স্নাতকোত্তৰ ছাত্ৰ সন্থাৰ সভাপতি অনুৰাগ কল্যাণ বৰগোহাঁইয়ে। উল্লেখযোগ্য যে,গুৱাহাটী বিশ্ববিদ্যালয়ৰ এয়াই প্ৰথম ভুল নহয় । মাৰ্কশ্বীট,এডমিট খেলিমেলি আদিকে ধৰি বিভিন্ন বিসংগতিৰে শিক্ষাৰ্থীৰ জীৱনৰ লগত বিশ্ববিদ্যালয় কৰ্তৃপক্ষই হেতালি খেলি আহিছে বুলি অভিযোগ উত্থাপন কৰে ছাত্ৰ-ছাত্ৰীয়ে।
লগতে চাওকঃবিষয় কেব : মোদীলৈ 5 হেজাৰ গামোছা-চিঠি পঠাব কটনিয়ানে!!
