গুৱাহাটী, ১৭ ডিচেম্বৰ: ৰাজ্যৰ ভিন্ন প্ৰান্তৰ লগতে গুৱাহাটী মহানগৰীতো বৃদ্ধি পাই আহিছে একাধিক গাড়ী চুৰিৰ ঘটনা ৷ এই গাড়ী চুৰিৰ চক্ৰসমূহে ন ন কৌশল অৱলম্বন কৰি গাড়ী চুৰি কৰি ৰাজ্যৰ লগতে বহিঃৰাজ্যত গাড়ীসমূহ বিক্ৰী কৰাৰ লগতে চুৰি গাড়ীসমূহ ভাঙি চিঙি ইয়াৰ যন্ত্ৰণাংশ বিভিন্ন ডেম্পত বিক্ৰী কৰি আহিছে । গোপন সূত্ৰৰ পৰা পোৱা এনে এক তথ্যৰ পম খেদি নুনমাটি আৰক্ষীয়ে গাড়ী চুৰিৰ সৈতে জড়িত এক বৃহৎ চক্ৰক কৰায়ত্ত কৰিবলৈ সক্ষম হয় (Guwahati police arrested car theft gang) ।
নুনমাটি আৰক্ষীয়ে শুকুৰবাৰে নিশাৰ ভাগত মহানগৰীৰ ছয়মাইল আৰু দিছপুৰ অঞ্চলত অভিযান চলাই গাড়ী চুৰি চক্ৰৰ লগত জড়িত ৩ টাকৈ গভাইত চোৰক গেপ্তাৰ কৰে । আৰক্ষীৰ জালত পৰা ধৃত চোৰকেইটা হৈছে ছয় মাইল অঞ্চলৰ ৱাহিদৰ ৰহমান(৩১) দাৰান্ধা অঞ্চলৰ ৰেজাউল আলী ওৰুফে বিতু (৩০) আৰু বিহাৰৰ কৈলেশ্বৰ পণ্ডিত । আৰক্ষী সূত্ৰে জানিব পৰা মতে, এই গাড়ী চুৰি চক্ৰৰ মূল দুই অভিযুক্ত ৱাহিদৰ ৰহমান আৰু ৰেজাউল আলী নামৰ ধৃত চোৰ দুটাই যোৱা ৪ নৱেম্বৰত মহানগৰীৰ নাৰেঙ্গীৰ পৰা জিতেন চন্দ্ৰ দাস নামৰ লোক এজনৰ AS 01- AC 9774 নম্বৰৰ এখন মিনি বাছ নাৰেঙ্গীৰ গণেশ মন্দিৰ সমীপৰ পৰা চুৰি কৰিছিল ।
