গুৱাহাটী, ১৮ জুন : মহানগৰীৰ বশিষ্ঠস্থিত ৰাজ্যিক বিজেপিৰ মুখ্য কাৰ্যালয়ত ৰাজ্যিক বিজেপিৰ সাধাৰণ সম্পাদক পুলক গোহাঁইৰ সংবাদমেল । মোদী চৰকাৰৰ ৯ বছৰীয়া বৰ্ষপূৰ্তি উপলক্ষে উদযাপন কৰা মহা জনসম্পৰ্ক অভিযান সন্দৰ্ভত আয়োজন কৰা হয় এই সংবাদমেল । মহা জনসম্পৰ্ক অভিযানৰ মূল ৰাজ্যিক দায়িত্বত থকা পুলক গোহাঁয়ে এই সংবাদমেলত কয় যে ৩০ মে’ৰ পৰা আৰম্ভ হোৱা মহা জনসম্পৰ্ক অভিযানৰ অন্ত পৰিব ৩০ জুনত ।
এই অভিযানৰ অংশস্বৰূপে ইতিমধ্যে ৫ টা লোকসভা সমষ্টিত সম্পন্ন হৈছে জনসভা । গুৱাহাটী, কৰিমগঞ্জ, বৰপেটা, ডিফু আৰু কলিয়াবৰত অনুষ্ঠিত হৈছে এই জনসভা । দেওবাৰে অৰ্থাৎ আজি শিৱসাগৰত অনুষ্ঠিত হ’ব যোৰহাট লোকসভা সমষ্টিৰ বিশাল জনসভা । এই সভাত উপস্থিত থাকিব বিজেপিৰ ৰাষ্ট্ৰীয় অধ্যক্ষ জেপি নাড্ডা । লগতে হোজাইত অনুষ্ঠিত হ’বলগীয়া নগাঁও লোকসভা সমষ্টিৰ জনসভাত উপস্থিত থাকিব কেন্দ্ৰীয় গৃহমন্ত্ৰী অমিত শ্বাহ ।
নগাঁও জনসভাৰ স্থান ঠিক কৰা হৈছে যদিও গৃহমন্ত্ৰীৰ পৰা মঞ্জুৰী লাভ কৰিলেই ঠিৰাং হ’ব এই জনসভাৰ তাৰিখ । মহা জনসভাৰ উপৰিও অনুষ্ঠিত হ’ব বিভিন্ন স্তৰৰ সভা । প্ৰতিটো লোকসভা সমষ্টিত ১০০০ বিশেষ পৰিয়ালক বাছি উলিয়াই জনসম্পৰ্ক গঢ়ি তোলা হৈছে । ২১ তাৰিখৰ পৰা বুথ পৰ্যায়ত ঘৰে ঘৰে সম্পৰ্ক ৰক্ষাৰ কাৰ্যসূচী অনুষ্ঠিত কৰা হ’ব ।
