গুৱাহাটী, ১৯ আগষ্ট: অনুপ্ৰৱেশৰ অন্তহীন সমস্যাই ৰাজ্যখনক ভাৰাক্ৰান্ত কৰি ৰখাৰ সময়তে কেন্দ্ৰীয় চৰকাৰৰ চৰম হেমাহিৰ বাবে স্বদেশী, বিদেশী চিনাক্তকৰণৰ প্ৰক্ৰিয়াটোৱে সংকটৰ সন্মুখীন হৈছে । চৰকাৰৰ অমনোযোগিতাৰ বাবে বিদেশী চিনাক্তকৰণৰ বাবে স্থাপন কৰা বিদেশী ন্যায়াধিকৰণসমূহে অস্তিত্বৰ সংকটত ভূগিবলগীয়া হৈছে । বৰ্তমান ৰাজ্যৰ বিদেশী ন্যায়াধিকৰণসমূহত ১,৩৬,১৭৩ টা গোচৰ অমীমাংসিত হৈ আছে । অমীমাংসিত গোচৰৰ সংখ্যা বৃদ্ধি পোৱাৰ বিপৰীতে বিদেশী ন্যায়াধিকৰণসমূহ বৰ্তি থকাৰ বিষয়টোকলৈ অনিশ্চয়তাই দেখা দিছে ।
উল্লেখ্য যে, ৰাজ্যৰ এশখন বিদেশী ন্যায়াধিকৰণৰ সদস্যৰ কাৰ্যকাল বিগত ২৩ মে'ত উকলি যোৱাৰ পাছতো এই পৰ্যন্ত সদস্যসকলৰ কাৰ্যকাল বৃদ্ধিত কেন্দ্ৰীয় চৰকাৰে অনুমোদন জনোৱা নাই । যাৰ পৰিপ্ৰেক্ষিতত ন্যায়াধিকৰণসমূহ বন্ধ হোৱাৰ আশংকা কৰা হৈছে । লক্ষণীয় বিষয় যে, বিদেশী ন্যায়াধিকৰণসমূহৰ কাম-কাজ, সুবিধা-অসুবিধাসমূহ নিয়মীয়াকৈ নিৰীক্ষণ কৰি আহিছে উচ্চ ন্যায়ালয়ে । ডব্লিউ পি (চি) ১৭৫৪/২০১৫ নম্বৰৰ গোচৰটোৰ ভিত্তিত ন্যায়ালয়ে প্ৰতি মাহে বিদেশী ন্যায়াধিকৰণৰ কাম-কাজসমূহ নিৰীক্ষণ কৰি যাৱতীয় নীতি-নিৰ্দেশনা প্ৰদান কৰি আহিছে ।
উল্লেখ্য় যে, এই সন্দৰ্ভত অলপতে গোচৰটোৰ পুনৰ শুনানি কালত ৰাজ্যৰ এশখন বিদেশী ন্যায়াধিকৰণৰ ভৱিষ্যতকলৈ এক উদ্বেগজনক ছবি পোহৰলৈ আহে । উচ্চ ন্যায়ালয়ত উন্মোচিত তথ্য অনুসৰি ৰাজ্যৰ বিদেশী ন্যায়াধিকৰণসমূহৰ সদস্যসকলৰ কাৰ্যকাল ২৩ মে'ত উকলি গৈছে । কিন্তু কাৰ্যকাল উকলি যোৱাৰ পাছতো বিগত প্ৰায় তিনি মাহে কেন্দ্ৰীয় চৰকাৰে সদস্যসকলৰ কাৰ্যকাল বৃদ্ধিৰ বাবে অনুমোদন জনোৱা নাই ।
উল্লেখ্য যে, সদস্যসকলৰ কাৰ্যকাল বৃদ্ধিৰ বাবে আপত্তিবিহীন প্ৰমাণপত্র বিচাৰি অসম চৰকাৰে কেন্দ্ৰীয় চৰকাৰেৰে বহুবাৰ যোগাযোগ কৰিছে । কিন্তু কোনো সঁহাৰি লাভ কৰা নাই । ইফালে, পুৰণি সদস্যসকলক লৈ সৃষ্টি হোৱা এনে অনিশ্চয়তাৰ বাবেই নতুনকৈ নিযুক্তি দিয়া দুশ বিদেশী ন্যায়াধিকৰণৰ সদস্যসকলকো কামৰ দায়িত্ব দিয়াৰ ক্ষেত্রতো জটিলতাৰ সৃষ্টি হৈছে । এই দিশসমূহ উচ্চ ন্যায়ালয়ৰ মজিয়াত অসম চৰকাৰৰ মহাধিবক্তাই দৃষ্টিগোচৰ কৰিছিল ।
আনহাতে, দিছপুৰৰ এক সূত্রৰ তথ্য মতে, কেন্দ্ৰীয় চৰকাৰে ৰাজ্যৰ বিদেশী ন্যায়াধিকৰণসমূহৰ সন্দৰ্ভত ৰাজ্য চৰকাৰৰ পৰা কেতবোৰ তথ্য বিচাৰিছিল । কিন্তু ৰাজ্য চৰকাৰৰ তৰফৰ পৰা সঠিকভাৱে তথ্যসমূহ দিব নোৱাৰাৰ বাবেই বিষয়টো এনেদৰে পৰি ৰৈছে । লক্ষণীয় বিষয় যে, পুৰণি সদস্যসকলৰ কাৰ্যকাল বৃদ্ধি নোহোৱাটোৱে জটিল পৰিস্থিতিৰ সৃষ্টি কৰাৰ সময়তে নৱনিযুক্ত দুশ সদস্যই চৰম সমস্যাৰ সন্মুখীন হ'বলগীয়া হৈছে । আনকি কাৰ্যালয়ত বহি কাম কৰিবলৈ চকী-টেবুলৰ অভাৱ হৈছে ।
ৰাষ্ট্ৰীয় নাগৰিকপঞ্জীৰ পৰা নাম বাদ পৰা লোকসকলৰ আবেদনৰ শুনানি গ্ৰহণৰ বাবে নতুনকৈ দুশ বিদেশী ন্যায়াধিকৰণৰ বাবে সদস্য বাছনি কৰা হৈছিল । কিন্তু ৰাষ্ট্ৰীয় নাগৰিকপঞ্জী উন্নীতকৰণ কৰা হ'ল যদিও সমগ্ৰ প্ৰক্ৰিয়াটো স্থবিৰ হৈ পৰিল । বিতৰ্কৰ মাজত সোমাই পৰিল ৰাষ্ট্ৰীয় নাগৰিকপঞ্জী । যাৰ বাবে বিদেশী সংক্ৰান্তীয় পুৰণি গোচৰৰ মীমাংসাৰ বাবে নতুন দুশ সদস্যক দায়িত্ব দিয়া হয় ।
নতুন সদস্যসকলক স্বতন্ত্র বিদেশী ন্যায়াধিকৰণৰ সদস্য হিচাপে নিযুক্তি দিয়াৰ বিপৰীতে চৰকাৰে পুৰণি এশ বিদেশী ন্যায়াধিকৰণতে তেওঁলোকক সংযুক্ত কৰি ৰাখিছে । উপযুক্ত আন্তঃগাঠনি নোহোৱাকৈ নতুন সদস্যসকলক সংযুক্ত কৰাৰ যথেষ্ট সমস্যাই দেখা দিছে । এই জটিল পৰিস্থিতিৰ মাজতে কেতবোৰ প্ৰশ্নৰো উদ্ভৱ হৈছে । ২৩ মে'ত কাৰ্যকাল উকলি যোৱা পুৰণি সদস্যসকলে বৰ্তমান কি হিচাপে কাৰ্যনিৰ্বাহ কৰি আছে ।
আনহাতে, কাৰ্যকাল উকলি যোৱাৰ পাছত এই সদস্যসকলে গোচৰ সন্দৰ্ভত দিয়া মতামত আইনৰ দৃষ্টিত কি হিচাপে গণ্য কৰা হ'ব । সেইদৰে স্বতন্ত্র বিদেশী ন্যায়াধিকৰণৰ দায়িত্ব নোপোৱা নতুন সদস্যসকলে বিদেশী সংক্ৰান্তীয় গোচৰ মীমাংসা কৰিবলৈ যাওঁতে নাইবা জাননী আদি জাৰি কৰাৰ ক্ষেত্রত কি হিচাপে জাননীত স্বাক্ষৰ কৰিব । এনেবোৰ প্ৰশ্নই বৰ্তমান এই সমগ্ৰ প্ৰক্ৰিয়াটোক আৰু অধিক জটিল কৰি তুলিছে ।
লগতে পঢ়ক:জোনাইত অ-প্রাদেশিকৃত বিদ্যালয়ৰ শিক্ষক-শিক্ষাৰ্থীৰ প্ৰতিবাদ
