গুৱাহাটী, 19 অক্টোবৰ : ‘‘আজি তাই অলিম্পিয়ান নহয় । তাই আজি সৰুপথাৰৰ গাঁৱৰ ছোৱালীজনী ৷ আজি হাতত গ্ল’ভছ নাই ৰিঙৰ ৰাণীৰ ৷ নাই ব্লু কৰ্ণাৰ বা ৰেড কৰ্ণাৰৰ হিচাব ৷ দেহত আজি পৰম্পৰাগত সাজযোৰ মেখেলা চাদৰ যোৰ ৷ কান্ধত গামোছা, দেহত তাঁতশালৰ চাদৰ ৷ আজি তাই অসমীয়া শিপা নাপাহৰা গাঁৱৰ ছোৱালীজনী ৷’’
এচিয়ান গেমচত ৰূপ জয় কৰাৰ পিচত নিজ ঘৰত জিৰণি লৈ আছে বক্সাৰ লাভলীনা বৰগোঁহায়ে । সৰুপথাৰৰ নিজৰ ঘৰত বুধবাৰে বক্সিং ৰিঙৰ ৰাণী লাভলীনা বৰগোঁহাইয়ে তুলসী তলত চাকি জ্বলাই পালন কৰিলে কাতি বিহু ৷ সামাজিক মাধ্যম ফেচবুকত লাভলীনাই নিজ ঘৰত কাতি বিহু পালন কৰাৰ কেইখনমান ফটো আপলোড কৰে বুধবাৰৰ সন্ধিয়া ।
ফটোবোৰত দেখা গৈছে এখন চালনিত পৰম্পৰাগতভাৱে ব্যৱহাৰ কৰা অমিতাৰ চাকি লৈ থাপনাৰ তুলসীৰ তলত লাভলীনাই জ্বলাইছে চাকি ৷ থাপনাৰ ওপৰত থকা শৰতৰ শেৱালি গছজোপাৰ পৰা থাপনাত সৰিছে শুভ্ৰ শেৱালি । বন্তি প্ৰজ্জ্বলিত কৰি অসমবাসীৰ কুশল কামনা কৰিলে লাভলীনাই ৷
ফেচবুকত লাভলীনাই অসমবাসীৰ কুশল কামনা কৰিলে এনেদৰে - “আজি কাতি বিহু উপলক্ষে অসমবাসী ৰাইজৰ মংগল আৰু শ্ৰী বৃদ্ধি কামনা কৰিলো...তুলসীৰ তলৰ চাকি গচিয়ে পোহৰাই তোলক ৰাজ্যবাসীৰ আশা আৰু আকাংক্ষা । শস্য শ্যামলা পথাৰ সোণগুটিৰে উপচি পৰি কৃষিজীৱি ৰাইজলৈ কঢ়িয়াই আনক সমৃদ্ধিৰ বতৰা ৷’’
উল্লেখ্য যে, বুধবাৰৰ দিনা সমগ্ৰ অসমে উদযাপন কৰিলে অসমীয়া চহা জীৱনৰ প্ৰাণৰ স্পন্দন কাতি বিহুটি ৷ আকাশ বন্তিৰে উজ্জ্বলি উঠিল ঘৰৰ চৌহদ, শস্য শ্যামলা পথাৰ ৷ পৰম্পৰা অনুসৰি, চহা কৃষকৰ সোণোৱালী শস্য সোণগুটি হৈ ভড়াল ভৰি পৰাৰ কামনাৰে আহিন আৰু কাতি মাহৰ দোমাহীৰ দিনা অসমীয়া ৰাইজে উদযাপন কৰিলে এই কঙালি বিহু ৷
লগতে পঢ়ক : Kati Bihu at Assam Bhawan : নতুন দিল্লীৰ অসম ভৱনত কাতি বিহু পালন মুখ্যমন্ত্ৰীৰ
